د ننګرهار په شينوارو ولسوالۍ کې سلګونه ولسي وګړو پر کونړ او خوست د پاکستاني پوځیانو د بريدونو په غبرګون کې چې د ښځو او ماشومانو په ګډون څه باندې ۴۰ کسان پهکې ووژل شول، لاریون کړی.
لاريونوال د مارکو په بازار کې د تورخم-جلال اباد لويې لار ته را وتلي و، د پاکستان پر ضد يې شعارونه ورکول او د ياد هېواد لهخوا يې د ولسي وګړو وژنه بشري جنايت باله. دوى وويل، پاکستان تل له اصولو او قوانينو سرغړونه کړې ده.
د سلاموطندار پښتو فېسبوکپاڼه وڅارئ
لاریونوالو له نړيوالې ټولنې وغوښتل چې د دې ناوړو کړونو د مخنیوي لپاره دې په نړيواله کچه پر دغه هېواد فشارونه وارد کړي.
دوى وویل چې پر افغان خاروه بريدونه د افغانستان په داخلي چارو کې لاسوهنه ده او له افغان حکومت هم غواړي چې هر بريد ته دې بالمثل ځواب وويل شي. دوى ډاډ ورکړ چې د تېر په څېر ولس د خپلو امنیتي ځواکونو په ننګه ولاړ دي او له خپلې خاورې به دفاع کوي.
پرون په خوست کې هم وروسته ترهغه سلګونه کسانو د پاکستان پر ضد واټونو ته را ووتل چې ياد هېواد په کونړ او خوست ولایتونو کې د خپلو بريدونو پر مهال ګڼ شمېر ولسي کسانو ته مرګ ژوبله واړوله چې مېرمنې او کوچنيان هم په کې شامل دي.
د يادونې ده چې له کلونو راهيسې پاکستان د افغانستان يوشمېر سرحدي سيمې په توغنديو ولي چې ډېر کله خلکو ته د مرګ ژوبلې د وراوښتو لامل شوي خو تازه هوايي بريدونو يې ګڼ شمېر غبرګونه راپارولي او له اسلامي امارت غوښتل شوي چې د دې مسلې په اړه جدي واوسي.
اسلامي امارت هم دغه بريدونه غندلي او وياند يې ذبیح الله مجاهد په يوه ټويټ کې ویلي، پاکستان دې په دا شان مسايلو د افغانانو حوصله نه ازمايي او بيا دې ورته اشتباه تکرار نهکړي؛ کنې ناوړه پایلې به ولري.
