د پلټنې عالي ادارې د تازه راپور پر بنسټ د سلام وطندار موندنې ښيي چې یو شمېر خصوصي پوهنتونونه هېڅ راز شرایط او معیارونه نه لري، ښوونیز نصاب یې نیمګړی دی، د ځینو پوهنځیو او د ماسټرۍ زده‌کړو لپاره جواز نه لري، استادان یې په شرایطو برابر نه دي، په خپل سر یې نوي پوهنځي جوړ کړي او دغه راز د تدریس لپاره مناسبې ودانۍ هم نه لري؛ خو لا هم فعالیت کوي او هر کال زده‌کوونکي فارغوي.

هغه اسناد چې د سلام‌وطندار لاس ته ورغلي ښيي چې کابو څلور میاشتې وړاندې ولسمشر غني د یوه حکم په صادرولو سره د لوړو زده‌کړو د خصوصي پوهنتونو جوړېدو د څرنګوالي څېړلو غوښتنه وکړه.

ولسمشر غني په دې حکم کې د پلټنې عالي ادارې د مرستیال په مشرۍ او د مالیې او عدلیې وزارتونو، لویې څارنوالۍ، ملي امنیت او د جمهوري ریاست د چارو ادارې په غړیتوب د یوه پلاوي جوړېدو غوښتنه وکړه چې له مخې یې باید دغه پلاوی د خصوصي پوهنتونو جوړېدو په اړه خپلې څېړنې د یوې میاشتې په ترڅ کې ولسمشر ته وسپاري.

د دغه حکم له صادرېدو څلور میاشتې اوړي خو د خصوصي پوهنتونو په تړاو چې ډېری خلک یې د منظم درسي پلان او مناسب تدریسي ځای له نشته او له لوړو فیسونو شکایت کوي، هېڅ پرېکړه نه ده شوې.

له جواز پرته د ماسټرۍ برنامې پيل

د پلټنې عالي ادارې موندنې ښيي چې د افغانستان د لوړو زده کړو خصوصي موسسه، د ابن سینا پوهنتون، دعوت پوهنتون، کاتب پوهنتون، باختر پوهنتون، خاتم النبیین پوهنتون، دنیا پوهنتون، د جامعه المصطفا پوهنتون کابل څانګه او د ازاد اسلامي پوهنتون د کابل څانګه سره له دې چې د درېیو دورو فراغتونو معیارونه یې نه دي پوره کړي، د کیفیت د تضمین او اعتبار ورکونې په پروګرام کې د خصوصي تحصیلي موسسو تر ټولو ښکته ځای کې راغلي او له همدې کبله د ماسټرۍ زده‌کړو د پیلولو شرایط نه لري، خو بیا یې هم په خپل سر د ماسټرۍ پروګرامونه پيل کړي او هر کال فارغان ورکوي.

د دې راپور په یوه برخه کې لولو چې «د لوړو زده کړو ډېری خصوصي پوهنتونونه او موسسې د لوړو زده کړو وزارت له لایحې سره سم، لږ ترلږه څلور تنه ډاکټر استادان نه لري ترڅو د ماسټرۍ پروګرام پيل کړي. د لوړو زده کړو وزارت هم د پروګرام په پيل کې د جواز له ورکړې وړاندې د خصوصي پوهنتونو د ماسټرۍ پروګرام لپاره د استادانو اسناد نه دي ارزولي.»

د پلټې عالي ادارې راپور کې زیاته شوې چې د افغانستان امریکايي پوهنتون، باختر، کتاب، خاتم‌النبیین، ازاد اسلامي پوهنتون، کاردان، دعوت، دنیا او د افغانستان د لوړو زده‌کړو موسسه له هغو خصوصي تحصیلي بنسټونو دي چې د ماسټرۍ په برخه کې یې له ټاکل شوي حد نه زیات زده‌کړیالان جذب کړي.

همدارنګه د کاردان پوهنتون اقتصاد څانګه کې، د افغانستان امریکايي پوهنتون د ټولنیزو علومو څانګه کې، د رڼا د لوړو زده‌کړو موسسې هم اقتصاد څانګه کې، د اریانا د لوړو زده‌کړو موسسې د حقوقو او سیاسي علومو، اقتصاد او معالجوي طب په برخه کې   او ځینو نورو د خصوصي لوړو زده‌کړو موسسو د جواز له اخیستو وړاندې فعالیت پیل کړی او زده‌کړیالان یې جذب کړي دي.

 

بې‌جوازه پوهنتونونه او د محصلانو جذب

وموغوښتل دغه راپور کې د اکثریت هغو پوهنتونونو نظر چې کسب‌الزامیت کوي ولرو، خو یوازې د کاردان پوهنتون د نظر په اخیستو بریالي شو.

د کاردان پوهنتون ویاند ډاکټر ظاهر ایوبي سلام‌وطندار سره خبرو کې د دغه مورد په ردولو سره وايي، د دغه پوهنتون د ژورنالیزم پوهنځی د ټولنیزو علومو پوهنځي په مجموعه کې فعالیت لري.

د هغه په وینا، د کاردان پوهنتون د ماسټرۍ په برخه کې له ټاکل شوي حده زیات د زده‌کړیالانو جذب تخطي نه بلکې، د ټولنې اړتیا بولي.

«زه دا موضوع په بشپړ ډول ردوم، چې مونږ دې له جواز پرته د ژورنالیزم او اقتصادي پوهنځي پیل کړي وي، دا موضوع واقعیت نه لري. د سوءتفاهم دغه سلسله خپله وزارت کې موجوده ده، دا د هغوی خپله اداري او دفتري ستونزه ده.»

د پلټې ادارې راپور ښيي چې د کاردان پوهنتون د ژورنالیزم، د مشعل پوهنتون د کمپیوټر ساینس، د رڼا پوهنتون د انګلیسي ژبې په برخه کې، بلخ کې د سعادت‌لارې د لوړو زده‌کړو موسسې د شرعیاتو په څانګه کې، د میوند د لوړو زده‌کړو موسسې د حقوقو او ټولنیزو علومو او د ساینس په څانګو کې، د افغان پامیر د لوړو زده‌کړو موسسې د حقوقو او سیاسي علومو په پوهنځي کې، د شفا د لوړو زده‌کړو موسسې د معالجوي طب په پوهنځي کې، د بیان د لوړو زده‌کړو موسسې د کمپیوټر ساینس او د مریم پوهنتون هم د ښوونې او روزنې په څانګه کې له جواز پرته او په ناقانونه ډول زده‌کړیالان منلي دي.

بې‌ودانۍ پوهنتونونه

د پلټنې ادارې څېړنې ښيي چې د جهان د لوړو زده‌کړو، د افغانستان د لوړو زده‌کړو، د بایزید روښان د لوړو زده‌کړو، د رازي د لوړو زده‌کړو او د ادراک د لوړو زده‌کړو موسسې د نورو کمزورتیاوو ترڅنګ، له رامنځته کېدو راهیسې د اکاډمیکو معیارونو پربنسټ مناسبې ودانۍ نه‌لري.

د لوړو زده‌کړو وزارت د خصوصي لوړو زده‌کړو موسسو او پوهنتونو چارو رییس احمدضیا یوسفزی سلام‌وطندار سره خبرو کې وايي، د خصوصي لوړو زده‌کړو ۹ موسسې او پوهنتونونه چې د لوړو زده‌کړو د قوانینو خلاف یې د ماسټرۍ په برخه کې فعالیت درلود، له سل زرو نیولې تر یو میلیون افغانۍ پورې نغدي جریمه شوي دي.

« توصیه، اخطار او ان د ماسټرۍ څانګې لغوه کېدل، هغه اقدمات دي چې وزارت زیاتره دغه موارد تطبیق کړي. اکثریت خصوصي پوهنتونه جریمه شوي، کومو پوهنتونونو چې له حده زیات محصلین نیولي د منلو نه دي، محصلین باید نورو سمسټرونو ته وساتي. دویمي ظرفیت ته په پام، رسمي مکتوب ورکړل شي چې دوی کولای شي د ماسټرۍ په برخه کې یو بل صنف هم ولري.»

خلکو تر دې وړاندې تل د خصوصي لوړو زده‌کړو موسسو او پوهنتونو کې لوړ فیس او ټيټ کیفیت نه شکایت کړی، خو تراوسه د دغې ستونزې حل لپاره په جدي ډول اقدام نه دی شوی.

د خلکو په باور لا هم یو شمېر پوهنتونونه د هېواد تحصیلي قوانینو ته شاه کړې او د خپلې غوښتنې په مطابق خلکو نه پیسې اخلي، خو د زده‌کړو کیفیت ته هېڅ پام نه کوي.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام