که څه هم د هېواد په بازارونو کې د خوراکي توکو بیې مخ په لوړېدو دي او د سوند توکو بیې هم لوړې شوي، د سوداګرۍ او صنایعو خونې مسوولان وايي، تر هغې چې د ګمرکونو برښنایي سیستم بېرته فعاله نهشي، د بازار وضعیت به همداسې ګډوډ وي.
د سوداګرۍ او صنایعو خونې غړی خانجان الکوزی وایي، د طالبانو په راتګ سره ګمرکونو او بانکونو کې پخوانی سیستم په ټپه ولاړ دی چې په بازار او اقتصادي راکړې ورکړې یې منفي اغیز کړی.
د سلاموطندار پښتو فېسبوکپاڼه وڅارئ
د الکوزي په خبره، سره له دې چې ځینې سوداګریز مارکېټونه تړل شوي، خو د خوراکي توکو د کمښت ستونزه به رامنځ ته نهشي.
د هغه په وینا، سرحدونو کې د خوراکي او سوند توکو واګونونه ولاړ دي او کله چې د ګمرکونو برښنايي سیستم فعاله شي، دا ستونزې به هم ورسره حل شي.
نوموړی زیاتوي، د ګمرکونو او بانکونو د کارونو په پیلېدو سره به د بازار وضعیت عادي حالت ته راوګرځي.
هغه زیاته کړه: «د سوند توکو بیې تر یوه بریده لوړې شوي، خو نور مواد ډېر نه دي قیمته شوي. د دوو-درېو میاشتو د اړتیا وړ توکي ذخیرو کی شته په ځانګړې توګه وړه، غوړي، بوره او داسې نور توکي ذخیره دي. د شمال له لارې په سلګونه واګونونه په ایران او اقینه بندرونو کی ولاړ دي چې هم ورکې تېل او هم خوراکي توکي دي. د ګمرکونو سیستم په فعالېدو سره سمېږي، ځکه دا سیستم برښنايي دی او دا چې فعال نهشي، نو منځنۍ اسیا هېوادونه د رېل واګونونو ته اجازه نه ورکوي چې تخلیه شي.»
- په هرات ګمرک کې د پراخ فساد له امله د سوداګرو اعتراض
- معترضو صرافانو د افغانستان بانک سرپرست اجمل احمدي په دیکتاتورۍ تورن کړ
- خراب امنیتي وضعیت کابل کې د خوراکي توکو بیې لوړې کړي
ټاکل شوې وه چې نن خصوصي بانکونه او د شهزاده سرای هم په کار پیل کړي، خو داسې ونه شول.
د طالبانو راتګ سره په ټپه ولاړ اقتصادي وضعیت په اړه د مالیې وزارت مسوولان څه نه وايي، خو د افغانستان بانک یوه سرچینه چې نه غواړي نوم يې خپور شي وايي، ډېر ژر به بانکونه په کار پیل وکړي.
په همدې حال کې د صرافانو د ټولنې پخوانی ویاند او صراف محمدهاشم روضهیي وایي، د شهزاده سرای د افغانستان بانک په امر تړل شوی او ښايي د شنبې په ورځ خصوصي بانکونو سره یو ځای کار پیل کړي.
هغه په دې اړه سلاموطندار ته وویل: «د صرافانو ټولنه د سرای شهزاده په خلاصولو کې کومه ستونزه نهلرې، خو دولت امر کړی چې د دولتي او خصوصي بانکونو تر خلاصولو دې باید صرافۍ تړلې وي او د شنبې له ورځې به بانکونه خلاص شي او شهزاده سرای به هم په کار پیل وکړي.»
له دې وړاندې طالب چارواکو ویلي وو، په دې کار کوي چې د خوراکي او نورو توکو په تعرفو او محصول کموالی راولي، ترڅو د توکو بیې راټيټې شي.
د دوی په وینا، اوس هم چې کوم مواد لېږدول کېږي، په محصول یې کموالی راوستل شوی دی.
