د کندوز محلي مسوولان وايي چې په دغه ولایت کې د یوې ټرافیکي پېښې له امله یو کس مړ شوی او څلور نور ټپیان دي.
د یاد ولایت د امنیې قومنداني ویاند عبیدالله عابدي وايي چې پېښه د کندوز او خاناباد ولسوالي پر لویه لاره په چهار سري سیمه کې د یوه کرولا ډوله موټر او زرنج ترمنځ رامنځته شوې ده.
نوموړی زیاتوي چې یاده ټرافیکي پېښه د چلوونکو د بېاحتیاطۍ له امله رامنځته شوې چې پرمهال یې یو کس مړ او څلور ټپیان شوي دي.
د پېښې ټپیان روغتون ته لېږل شوي او د روغتیايي مسوولانو په وینا چې د یوه ټپي روغتیايي وضعیت د اندېښنې وړ دی. دا په داسې مهال ده چې نن په فاریاب کې هم د یوې ټرافیکي پېښې پرمهال یو کس مړ شوی او ۱۱ نور ټپیان دي.
د سلاموطندار پښتو برخه دلته وڅارئ
مسوولان د لارو خرابوالی، د موټر چلوونکو بېاحتیاطي او له ټرافیکي قوانینو نه خبرتیا هغه لاملونه بولي چې له امله یې ټرافیکي پېښې رامنځته کېږي.
