له هرات وروسته د کابل، خوست، تخار، ننګرهار او بدخشان ولایتونو ډېری اوسېدونکو د افغان ځواکونو په ننګه او له طالب ډلې د کرکې په موخه د «الله اکبر» نارې وکړې. خلک داسې مهال واټونو ته راووتل چې په یوشمېر ولایتونو کې جګړې زور اخیستی او طالبانو د څو ولایتونو په ښارونو کې د جګړې سنګر تود ساتلی دی.

د افغان ځواکونو په ملاتړ او طالبانو پر ضد د «الله اکبر» ناره لومړی هراتیانو اوچته کړه چې بېګاه په نورو ولایتونو کې هم په پوره شور بدرګه شوه. هراتیانو له دې سره هم‌مهاله په ټولنیزو رسنیو کې هم د «هرات پاڅون» په نوم هشټګ جوړ کړ او امنیتي او دفاعي ځواکونو ورسره جوخت د طالبانو پر وړاندې ډېر پرمختګ وکړ.

د سلام‌وطندار پښتو فېسبوک‌پاڼه وڅارئ

د کابل، خوست، ننګرهار، تخار او بدخشان اوسېدونکو بېګاه د «الله اکبر» په نارو له هراتیانو سره همغږي شول او د هرات پاڅون ته یې تازه ساه ورکړه.

د کابل اوسېدونکو بېګاه نهه بجې د ښار واټونو او کوڅو ته په راوتلو او د کورونو بامونو ته په ختلو او د «الله اکبر» په نارو سره یو ځل بیا طالبانو ته وښوده چې تل به د افغان ځواکونو ترڅنګ ولاړ وي او ملاتړ به یې کوي.



د ولسمشر لومړي مرستیال امرالله صالح هغه ویډیو چې پر ټولنیزو رسنیو خپره شوې، ښيي چې یوشمېر هېوادوال ورسره اوږه په اوږه روان دي او د «الله اکبر» په نارو سره د مزدورو طالبانو پر ضد د مرګ او د «ژوندي دې وي امنیتي ځواکونه» شعارونه ورکړل. تېره شپه د دغو غږونو ترمنځ د ماشومانو غږونه هم اورېدل کېږي.

د پوهنتون استادې او مدني فعالې حمیرا قادري هم پر خپلې پاڼې یوه ویډیو خپره کړې چې له خپل زوی سره یوځای د «الله اکبر» نارې وهي.

پر کابل سربېره، په خوست او ننګرهار کې د «الله اکبر» نارې د بدرګه کېدو خپرې شوې ویډیوګانې هم ښيي چې یوشمېر ځوانان د افغانستان له ملي بیرغ سره سړکونو ته راوتلي او د «الله اکبر» نارې ترڅنګ، «مرګ د افغانستان پر دښمنانو!» شعارونه ورکوي.

سلام‌وطندار پر ټویټر هم وڅارئ

په تخار کې د سلام‌وطندار خبریال وايي، تېره شپه د تالقان ښار اوسېدونکي چې د هرات له پاڅون او خلکو څخه په ملاتړ د خپلو کورونو بامونو ته ختلي او سړکونو ته راوتلي وو، د طالبانو او داعشیانو پر ضد او د افغان امنیتي او دفاعي ځواکونو په ملاتړ یې شعارونه ورکول. د هغه په خبره، تخاریانو د جګړې غندنه او د سولې غوښتنه هم کوله.

په ورته وخت کې د ولسمشر سلاکار وحید عمر وايي، خلک د طالبانو پر وړاندې ولاړ دي او د «الله اکبر» نارې یې ووهلې. د هغه په وینا، د طالبانو پر وړاندې د «الله اکبر» نارې وښوده چې دې ډلې ځان له ملت سره مواجه کړی او په وینا یې، نور به طالبانو د خلکو له لاسه د ارام ساه وا نه‌خلي.

خو د طالب ډلې ویاند ذبېح‌الله مجاهد پر ټویټر لیکلي چې طالبانو په تېرو شلو کلونو کې د الله اکبر شعار په ورکولو سره د امریکایانو پر وړاندې جګړه کړې او دا د امریکایانو د غلامانو او سېکولرانو شعار نه دی. هغه خبرداری ورکړی چې له کاذبو شعارونو څخه نه وېرېږي او له غلامانو سره به د خدای لپاره حساب و کتاب وکړي.

د ولسمشر لومړي مرستیال امرالله صالح هم پر خپلې فېسبوک‌پاڼې لیکلي چې طالبان به یوشمېر کسان د «الله اکبر» نارې ویلو له کبله هم ووژني؛ ځکه په خبره یې، همدا یې کار دی.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام