د امریکا ولسمشر جو بایډن د دغه هېواد کانګرېس ته یو لیک لېږلی او په‌کې لیکلي یې دي چې د امریکا متحده ایالات د افغان امنیتي او دفاعي ځواکونو ملاتړ ته دوام ورکوي.

بایډن لیکلي چې له افغانستانه د بهرنیو ځواکونو له وتلو وروسته په دغه هېواد کې پر پېښو ترهګریزو ګواښونو سترګې نه پټوي او د ترهګرۍ مخنیوي او دغو ګواښونو پر وړاندې به خپل ځواک له سره تنظیم کړي.

د سلام‌وطندار پښتو فېسبوک‌پاڼه وڅارئ

د امریکا د ولسمشر په لیک کې زیاته شوې: «د امریکا متحده ایالات د افغان دولت او طالب ډلې ترمنځ د سولې هغو خبرواترو بشپړ ملاتړ کوي چې د ملګرو ملتونو په همکارۍ کېږي او په سیمه کې له نورو هېوادونو، په تېره پاکستان څخه غواړي چې په افغانستان کې د ثبات راتلو د ملاتړ لپاره ډېر ګامونه اوچت کړي.»



په همدې حال کې د امریکا د دفاع وزارت ویاند جان کربي هم پرون ویلي و چې د دغه هېواد د ګډو ځواکونو لوی درستیز مکېنزي او همکاران یې پر هغو قراردادي هوکړو کار کوي چې وکولای شي په دوامداره توګه په راتلونکي کې د افغان ځواکونو، په ځانګړي ډول د هغوی الوتکو د ساتنې په برخه کې ملاتړ ته لاره هواره کړي.

د چارو شنونکي هم د امریکا له لوري د افغان ځواکونو د ملاتړ دوام ګټور بولي او زیاتوي چې اغېز یې له ښه مدیریت سره تړلی دی.

د سلام‌وطندار پښتو برخه پر ټویټر هم وڅارئ

د نظامي چارو شنونکی عتیق‌الله امرخېل باور لري چې په هېواد کې کېدونکي نظامي عملیات له کلونو راهیسې د افغان ځواکونو له لوري کېږي او یوازې اړتیا ده چې لپاره یې اسانتیاوې او تجهیزات برابر شي.

د نوموړي په وینا، که له افغان ځواکونو سره پر خپل وخت مرستې وشي او اوسنۍ انګېزه یې وساتل شي، د هېواد د وضعیت پر ښه کېدو مثبت اغېز کولای شي.

د امریکا د ګډو ځواکونو پوځي قوماندانۍ تر دې وړاندې ویلي و چې له افغانستانه د امریکايي ځواکونو د را اېستلو لړۍ ۵۰ سلنه بشپړه شوې او د جو بایډن د پلان له مخې، ټاکل شوې د ټولو ځواکونو د را اېستلو لړۍ یې د روان زېږديز کال د سپټمبر تر یوولسمې پورې بشپړه شي.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام