افغانستان ته د مرستو راټولولو په موخه په سویس کې د ملګرو ملتونو، انګلستان، المان او قطر په کوربهتوب په جوړې شوې ناسته کې افغانانو سره د مرستې لپاره ۲.۴ میلیارده ډالر راټول شوي دي.
دغه ناسته د «افغانستان کنفرانس ۲۰۲۲» تر عنوان لاندې پرون د سویس په جېنوا ښار کې جوړه شوې وه او شاوخوا د ۴۱ سازمانو استازیو پهکې ګډون کړی وو. د اسلامي امارت کوم چارواکی دغې ناستې ته نهوو وربلل شوی.
د سلاموطندار پښتو فېسبوکپاڼه وڅارئ
تر دې مخکې د ملګرو ملتونو سرمنشي انتوني ګوترېش له نړیوالې ټولنې د افغانستان لپاره د ۴،۴ میلیارده ډالرو مرستې غوښتنه کړې ده.
په یاده ناسته کې د اسلامي امارت له لوري له شپږم ټولګي پورته د نجونو ښوونځیو د تړل کېدو له امله د ملګرو ملتونو لهخوا د غوښتل شویو پیسو د نیمايي برخې د ورکړې ژمنه شوې ده.
په دغه ناسته کې بریټانیا له افغانستان سر د ۲۸۶ میلیونه پونډه، امریکا د ۲۰۴ میلیون ډالرو، اروپايي ټولنې د ۱۱۳ میلیون یورو، ناروې ۸۰ میلیونه ډالر ، قطر د ۲۵ میلیون او کویټ د ۱۰ میلیونه ډالر مرستې ژمنه کړې ده. پاکستان بیا په دغه ناسته کې له افغانستان سره د نغدو پيسو د ورکړې ژمنه نه ده کړې.
مرستندویه هېوادونو ویلي چې دغه مرستې به د ملګرو ملتونو سازمانونو ته ورکول کېږي او هېڅکله به د اسلامي امارت جېب ته نه ځي.
په همدې حال کې د ملګرو ملتونو سرمنشي انټونیو ګوټرېش په یاده ناسته کې د خپلو خبرو پرمهال افغانستان کې د وژونکي وضعیت پر مخنیوي ټينګار وکړ او د اسلامي امارت له لوري د ښوونځیو پر تړل کېدو یې نیوکه وکړه.
دا مهال د افغانستان ۲۴ میلیون نفوس بشري مرستو ته اړتیا لري او ملګري ملتونه افغانستان د نړۍ یو تر ټولو بد بحران یادوي.
ګوترېش په خپلو خبرو کې وویل چې د افغانستان ۹۷ سلنه خلک بشپړ خوراکي توکي نه لري او کابو ۹ میلیونه یې له وچکالۍ سره مخ دي.
نوموړي همداراز زیاته کړې چې مرستندویه هېوادونه باید افغانستان په داسې سختو شرایطو کې یوازې پرې نهږدي.
