د اسلامي دولت نومې ډلې یا (داعش) اعلان کړی چې د بلخ ولایت په مرکز مزارشریف ښار د درېیمې او لسمې امنیتي حوزې اړوند سیمو کې د پرونیو چاودنو مسوولیت پر غاړه اخیستی دی. په دغو چاودنو کې ۹ ملکیان وژل شوي او ۱۳ نور ټپیان شوي وو.
د افغانستان پخواني ولسمشر حامد کرزي او د مخکیني حکومت د ملي روغې جوړې عالي شورا رییس عبدالله عبدالله دغه چاودنې په کلکو ټکو غندلي دي.
د سلاموطندار پښتو فېسبوکپاڼه وڅارئ
بلخوا نن کابل کې د ترکیې سفارت په یوې خبرپاڼه کې د بلخ پرونۍ چاودنې غندلې دي. د ترکیې سفارت په یوې خبرپاڼه کې ویلي، دوی دغه غیرانساني حملې چې په وروستیو کې یې شمېر زیات شوی، په کلکه غندي.
پخواني ولسمشر حامد کرزی دغه چاودنې د «بشر ضد جنایت» بللی او هغه یې د افغانانو د سولې او سوکالۍ او د ټولو انساني، اسلامي ارزښتونو او اصولو سره په ټکر کې بللی دی.
له دې وړاندې هم کابل، بلخ، کندوز، کندهار او یوشمېر ولایتونو کې پر شیعهګانو او هزاره وګړو د شویو بریدونو مسوولیت اسلامي دولت نومې ډلې یا داعش پر غاړه اخیستی دی.
