د ټول هېواد په کچه د امنیتي وضعیت د خرابېدو او یو پر بل پسې د ولسوالیو د سقوط په دوام، په تېرو۲۴ ساعتونو کې په تخار ولایت کې ۶ ولسوالۍ د طالبانو لاس ته لوېدلي دي. په تخار کې ځايي سرچینې سلام‌وطندار ته وايي، چال، هزارسموچ، ینګي‌قلعه، خواجه غار، دشت‌قلعه او نمک‌آب ولسوالۍ د دولت له کنټرول څخه وتلي او د طالبانو له لوري نیول شوي دي.

د تخار د ولایتي شورا رییس محمد اعظم افضلي سلام‌وطندار ته وویل، د دغو ولسوالیو د سقوط ترڅنګ د ولایت په مرکز کې جګړه په شدت سره روانه ده.

هغه وویل: «څنګه چې تاسو خپله وینئ، تخار کې جګړه روانه ده. تراوسه ۷ ولسوالۍ سقوط شوي. جګړه د تالقانو ښار ته رسېدلې او خلک ډېر په وېره کې دي، داسې کوم اقدام چې د خلکو مورال لوړ شي، د دولت له خوا نه دی شوی. دغه وضعیت د خلکو پر روحیې منفي اغېز کوي. په ټوله کې ویلی شو، چې جګړه د تالقانو ښار دروازې ته رسېدلې.»

د سلام‌وطندار پښتو  فېسبوک‌پاڼه وڅارئ

د تخار د نمک‌اب ولسوالي امنیه قومندان ملا ظاهر هم طالبانو سره په جګړه کې وژل شوی. د طالبانو  یوه ویاند ذبیح‌الله مجاهد ویلي، دغه ولسوالي له ټولو پوځي مهماتو سره  د دوی جنګیالیو نیولې ده.

د تخار اوسېدونکي د ولسوالیو سقوط څخه اندېښنه ښيي او وايي، سره له دې چې د تخار څو مهمې ولسوالۍ د طالبانو لاس ته لوېدلي، پاتې نورې ولسوالۍ هم د طالبانو د کلابندۍ له ګواښ سره مخ دي.

دوی خبرداری ورکوي، که حکومت اقدام ونه کړي دغه ولایت به په بشپړ ډول د طالبانو لاس ته ولوېږي. د تخار ولایت اوسېدونکی صدام حسین بشاش وایي، له څو ورځو راهیسې د دغه ولایت ولسوالۍ پرله‌پسې د طالبانو لاس ته لوېږي او نن دشت‌قلعه او خواجه‌غار هم د طالبانو لاس ته ورغلي. نوموړی پر حکومت نیوکه کوي چې تراوسه یې د دغه ولایت د ولسواليو د سقوط په اړه کوم اقدام نه دی کړی.



په همدې حال کې د رپوټونو پر اساس، سمنګان ولایت کې د دره‌صوف بالا، بلخ کې چهاربولک، فاریاب کې کوهستان، جوزجان کې خانقا او کندوز ولایت کې دشت‌ارچي ولسوالۍ هم پرته له نښتو د طالبانو لاس ته ورغلي دي.

دغې ډلې ادعا کړې چې د ولسوالیو د نیولو پر مهال یې د امنیتي ځواکونو ګڼ‌شمېر مهمات هم ترلاسه کړي دي.

بل‌خوا د سمنګان د ولایتي شورا مرستیال محمد هاشم سروري وایي، د ولسوالۍ مرکز له جګړې پرته طالبانو ته تسلیم شوی او امنیتي ځواکونو شاه تګ کړی دی. د هغه په وینا، یو‌شمېر سیمو ته طالبانو ورغلي او امنیتي ځواکونو هلته د سمبالېدو په حال کې دي او ښايي جګړه رامنځ ته شي.

ومو غوښتل رپوټ کې د ولسوالیو سقوط په اړه د دفاع وزارت نظر هم ولرو، خو د دغه وزارت ویاندویانو د سلام‌وطندار اړیکو ته ځواب ورنه کړ.

پدې خبر پورې اړوند:

شریک یې کړی:
به اشتراک گذاری بر روی facebook
به اشتراک گذاری بر روی twitter
به اشتراک گذاری بر روی telegram
به اشتراک گذاری بر روی whatsapp
به اشتراک گذاری بر روی email
به اشتراک گذاری بر روی print
د نن ورځې خبرونه
تحلیلونه او خبري راپورونه

خبرونه د ټولنیزو شبکو سایټونو سلام دوستانو تعقیبوي:

فیسبوک

توییتر

تلگرام