ولسمشر محمد اشرف غني وايي، د سولې بينالافغاني خبرې دې د قران او اسلامي شريعت پر بنسټ وي. نوموړی وايي، طالبان ادعا کوي چې کلونه يې دين لپاره مبارزه کړې؛ خو د سولې خبرې له امريکا سره د شوې هوکړې پر بنسټ کوي.
ولسمشر چې «نن پنجشنبه د لړم ۸مه» د اسلام د ستر پیغمبر حضرت محمد ص د زوکړې ورځې په مناسبت نمانځغونډه کې وينا کوله، له طالبانو وغوښتل چې له تاوتريخوالي لاس واخلي او د سولې په بينالافغاني خبرو کې د قران او اسلامي شريعت پر بنسټ خبرې وکړي او همداراز د افغانستان له ديني عالمانو سره خبرې وکړي.
جمهور رييس وايي، هغه څه چې د سولې له لارې ترسره کېږي، هغه د جنګ له لارې نه کېږي.
نوموړي طالبان د جوماتونو او مدرسو پر ورانولو تورن کړل او ټينګار کوي چې هر هغه څوک چې فکر کوي دا ملت به وپاشي، ناکامېږي.
ولسمشر په خپلو خبرو کې زياته کړه، د نظام ماهيت اسلامي دی او امنيتي او دفاعي ځواکونه د اسلامي قوانينو او باورونو پر بنسټ عمل کوي.
شاوخوا یوه نيمه میاشت کېږی د طالبانو او افغان دولت پلاوو دوحه کې خبرې پیل کړي؛ خو تراوسه د خبرو لپاره پر کړنلاره هوکړه نه ده شوې او پر ځینو مواردو اختلاف شته.
