د نورستان چارواکي وايي، د ختیځ نورستان په کامدېش ولسوالي کې د سېلابونو له امله د ۱۸۰ ورکو خلکو له جملې تر اوسه ۶۵ جسدونه موندل شوي دي. د نورستان والي حافظ عبدالقیوم سلاموطندار ته ویلي چې د سېلاب وړیو په ډله کې مېرمنې، ماشومان او سپینږیري شامل دي.
وړمه شپه د ختیځ نورستان د کامدېش ولسوالي په میردېش سیمه کې له سختو اورښتونو وروسته سېلاب راغی او نږدې سل کورونه یې له خلکو، څارویو او وسایلو سره یووړل.
د سلاموطندار پښتو فېسبوکپاڼه وڅارئ
حافظ عبدالقیوم وايي، سیمې ته د سرې میاشتې مرستندویه ډلګۍ رسېدلي او ژر به خلکو ته د اوښتي زیان او مرګژوبله معلوم کړي. هغه وايي، که څه هم میردېش سیمه د طالبانو په ولکه کې ده، خو که دا ډله مداخله ونه کړي، حکومت ژمن دی چې سیمې ته بشري مرستې ورسوي. والي وايي، د ورکو شویو خلکو ځینې جسدونه په کونړ کې موندل شوي دي.
د نورستان د ولایتي شورا یو غړی ظاهر نورستانی هم وايي چې تر اوسه د کامدېش د ورکو شویو له ډلې شاوخوا اویا جسدونه موندل شوي، خو په وینا یې، تر اوسه سیمې ته هېڅ ډول مرسته نه ده رسېدلې.
- نورستان کې سېلابونو یو کلی وړی
- افغانستان د منځنۍ او سختې وچکالۍ دورې په مخ کې لري
- بغلان او سمنگان د سېلابونو غېږ کې؛ جګړې خلکو ته د مرستې رسېدو مخه نیولې
د نورستان چارواکو پر ټولو خلکو غږ کړی چې د کونړ سیند په اوږدو کې دې د کامدېش د سیند وړیو جسدونو په پیداکولو کې همکاري وکړي.
د نورستان د ولایتي شورا رییس سعدالله پایندهزوی وايي، په سېلاب ځپلې سیمه کې د خلکو کورونه د خوړ پر غاړه اباد شوي وو چې اوبو په مخه کړي دي. نوموړی وايي، د حکومت په مرکزي اداره یې غږ کړی چې خلکو ته مرستې ور ورسوي.
د نورستان ولایت اوسېدونکي د کامدېش پېښه «لوی انساني ناورین» بولي او وايي، د حکومت مرکزي ادارې او نورو مرستندویه بنسټونو تر اوسه په دې برخه کې لازم اقدامات نه دي کړي.
سلاموطندارا پر ټویټر هم وڅارئ
د نورستان یو اوسېدونکی عبدالخالق وايي، حکومت، نړیواله ټولنه او نور خیریه بنسټونه دې په کامدېش ولسوالي کې له سېلاب ځپلیو سره مرستې وکړي. هغه زیاتوي چې تر اوسه هېچا د خلکو لازم لاسنیوی نه دی کړی او په دې برخه کې بېغوري د اندېښنې وړ ده.
د کامدېش سېلاب ځپلې سیمه د طالبانو په لاس کې ده. دغې ډلې ویلي چې د سیمې له خلکو سره یې پنځه میلیونه نغدي مرسته کړې ده. د طالب ډلې ویاند ذبېحالله مجاهد ویلي چې په نورستان او کونړ کې یې خپلو وسلهوالو ته لارښوونه کړې، څو د جسدونو په پیدا کولو کې مرسته وکړي.
څو کاله مخکې د کامدېش څنګ ته پرتې برګیمټال ولسوالي د افسې کلی هم واورو لاندې کړ چې له کبله یې لسګونه کسان مړه شول.
