د اسلامي امارت د دفاع وزارت د مخکیني حکومت د پوځ د اتو قولاردو ګانو نومونه بدل کړي دي. د هغه حکم له مخې چې د دفاع وزارت د سرپرست محمدیعقوب مجاهد په لاسلیک سره خپور شوی، په کابل کې د ځانګړو عملیاتو قول اردو، د مرکزي قول اردو په نوم، نومول شوی او د بلخ ۲۰۹ شاهین قول اردو الفتح ته اوښتی دی.
همدا راز په دغه حکم کې د کندوز ۲۱۷ پامیر قول اردو د عمري په نوم، د کندهار ۲۰۵اتل قول اردو د البدر په نوم او په هلمند ولایت کې د ۲۱۵میوند قول اردو بیا عزم په نوم بدل شوې دي.
د سلاموطندار پښتو فېسبوکپاڼه وڅارئ
د اسلامي امارت د دفاع وزارت همداراز د ۲۰۱ سېلاب قول اردو چې مرکز یې په ختیځ ننګرهار ولایت کې و، د خالد بن ولید په نوم نومولی دی، خو اوس یې مرکز لغمان ولایت ته لېږدولی دی.
په ورته مهال دغه وزارت په پکتیا کې د ۲۰۳ تندر قول اردو بیا د منصوري او په هرات کې د ۲۰۷ظفر قول اردو بیا د الفاروق په نومونو اړولې دي.