د ایران یوه لوړپوړي چارواکي امریکا ته خبرداری ورکړی چې د ایران د بندرونو پر وړاندې روانه کلابندي دې پای ته ورسوي، کنه نو، د عمان سمندر به د امریکايي ځواکونو هدیره شي.
د ایران د مصلحت تشخیص شورا غړي او د سپاه پاسداران پخواني قوماندان محسن رضايي دولتي ټلوېزیون ته ویلي چې د ایران پوځ د هر ډول نورو نښتو لپاره بشپړ چمتووالی لري.
رضايي وویل: «موږ امریکايي پوځ ته سپارښتنه کوو، وړاندې له دې چې د عمان سمندر ستاسو لپاره هدیره شي، سمندري کلابندي مو پای ته ورسوئ.»
هغه د امریکا له لوري د ایران د بندرونو کلابندي «د جګړې اقدام» وباله او ویې ویل چې تهران د دې وضعیت پر وړاندې د درېدو حق لري.
د نوموړي په وینا، هر څومره چې امریکا دا سمندري کلابندي اوږدوي، همغومره به د نړۍ هېوادونو ته زیانونه زیات شي. رضايي د جګړې د پای ته رسولو لپاره د خبرو په اړه هم وویل چې امریکا باید په عملي ډول وښيي چې د باور وړ دی.
هغه زیاته کړه: «اوس امریکا باید ځان ثابت کړي. زموږ وسلهوال ځواکونه ګوته پر ماشه ولاړ دي، خو له بل لوري ډیپلوماټیکې هڅې هم روانې دي.»
د امریکا سمندري کلابندي د اپرېل پر ۱۳مه پیل شوې ده. د امریکا ولسمشر ډونالډ ټرمپ ویلي، دا بندیزونه به تر هغه دوام ولري، څو ایران د امریکا په شرایطو د سولې هوکړه ونهمني.
خو تهران ټینګار کړی چې د امریکا فشارونو ته به غاړه کېنږدي.