غزه کې د حماس د لوړپوړي قومندان تر وژلکېدو وروسته د یمن حوثي ډلې له حماس د خپل ملاتړ څخه د دوام ډاډ ورکړی دی.
د حوثیانو د پوځ مشر یوسف حسن المداني پر خپل ټیلیګرام د خواخوږۍ په پیغام کې ویلي چې د حماس د قومندان عزالدین الحداد وژلکېدل، د فلسطیني مقاومت او د سیمې لپاره ستره ضایعه ده.
یوسف حسن المداني ویلي: «حوثیان به له حماس او نورو متحدو ډلو سره خپلې ګډې هڅې تر هغه روانې وساتي، څو د دوی په وینا «بریا ترلاسه شي.»
راپورونه وایي، عزالدین الحداد د غزې په شمال کې د اسراییلو هوايي برید پرمهال وژل شوی دی.
ویل کېږي، نوموړی هغه مهال په نښه شوی چې د حماس له یوشمېر نورو غړو سره په یوه پټ مرکز کې موجود و.
اسراییلي پوځ تر اوسه په رسمي ډول د هغه د وژلکېدو بشپړ جزییات نه دي خپاره کړي، خو حماس د هغه وژل کېدل تایید کړي او نوموړی یې د فلسطیني مقاومت مهم قومندان بللی دی.