د اسلامي امارت ویاند ذبېحالله مجاهد وايي چې بېګاه یې د کابل د اووهلسمې امنیتي حوزې په اړوند سیمه کې د داعشیانو پر مرکز عملیات کړي او یاد مرکز یې له منځه وړی دی. هغه وايي، دغه عملیات د طالبانو د ځانګړو ځواکونو له لوري شوي دي.
نوموړي که څه هم د اوښتې مرګژوبلې په اړه څه نه دي ویلي، خو ټینګار یې کړی چې په مرکز کې مېشت داعشیان وژل شوي دي.
د سلاموطندار پښتو فېسبوکپاڼه وڅارئ
بېګاه د کابل په شمالي برخه کې څو پرلهپسې چاودنې وشوې. د اسلامي امارت چارواکو په هماغه پیل کې ویلي و چې له داعشیانو سره نښتي دي. ځینو ځايي سرچینو هم ویلي و چې وسلهوالو د کابل په شمال کې د طالبانو پر سنګر برید کړی دی.
بلهخوا پرون د کابل ښار په عیدګاه جومات کې د ذبېحالله مجاهد د مور د فاتحې پر مراسمو هم چاودنه وشوه چې د له کبله یې د اوښتې مرګژوبلې په اړه بېلابېل راپورونه خپاره شوي دي.
ځینو رسنیو لیکلي چې په یاده چاودنه کې اته کسان وژل شوي او شل نور ټپیان دي، خو ځینو نورو بیا د پنځو کسانو د وژل کېدو او یوولس نورو د ټپي کېدو خبر هم ورکړی دی.
تر اوسه کوم چا یا ډلې د دغه برید مسوولیت پر غاړه نه دی اخیستی.
