د جوزجان ولایت په اقچه ولسوالي کې د اسلامي امارت مسوولان وایي چې په دغه ولسوالي کې د واده پر مراسمو د لاسي بم چاودنې له امله، ناوې خپل ژوند له لاسه ورکړی او دوه مېرمنې پکې ټپیانې شوې دي.
د اقچې ولسوال مولوي نعمتالله سلاموطندار ته وایي چې دغه پېښه بېګاه ماښام د دغې ولسوالي د «قصر عروس» په هوټل کې شوې ده. د نوموړي په وینا، دغه پېښه هلته رامنځ ته شوه چې کله ناوې د واده تالار ته دننه کېده.
د سلاموطندار پښتو فېسبوکپاڼه وڅارئ
د اقچې ولسوال زیاتوي، د لومړنیو څېړنیو او راټول شوي معلومات ښايي چې یاده پېښه د شخصي دښمنۍ له امله رامنځ ته شوې ده.
په همدې حال کې د اقچې ولسوالي یوشمېر اوسېدونکي چې د پېښې پرمهال سیمه کې وو، وایي چې د لاسي بم له چاودنې وروسته یوشمېر ماشومان او مېرمنې د تېښتې پرمهال تر پښو لاندې شوي او ټپیان دي.
سلاموطندار پر ټویټر هم وڅارئ
تراوسه د یادې پېښې مسوولیت کوم چا یا ډلې پر غاړه نه دی اخیستی.
