د هلمند پوهنې ریاست مسوولان وايي چې د دغه ولایت په یوشمېر ولسوالیو کې د جګړو پر مهال د ویجاړو شویو ښوونځیو له ډلې د ۳۶ هغو ودانۍ بیا رغول کېږي.
د هلمند د پوهنې رییس مولوي محمدعوض انصاري وايي، یادې ودانۍ په جګړو کې ویجاړې شوې وې او اوس یې یونیسف او ایارسي موسسې بیا جوړوي.
هېواد کې د نږدې دوو لسیزو جګړې نه یوازې سلګونو زرو افغانانو ته مرګژوبله واړوله، بلکې د خلکو کورونه، ښوونځي، پلونه، جوماتونه او نور عامه بنسټونه یې هم ونړول.
دې جګړې د هېواد په بېلابېلو برخو، په تېره سویلي ولایتونو کې له خلکو ډېره قرباني واخیسته او اوسېدونکي یې ان د ژوند له لومړنیو خدمتونو بېبرخې وو.
