د امریکا ولسمشر جو بایډن او د اوکراین ولسمشر ولودمیر زیلنسکي ټيلیفوني خبرې کړي دي. سپېنې ماڼۍ ویلي چې دواړه ولسمشران په دې ټيلیفوني اړیکه کې نیم ساعت غږېدلي.
د سپینې ماڼۍ د خبرپاڼې له مخې، بایډن د امریکا په کانکرېس کې اوکراین سره د لا ډېرو مرستو د تصویب له هڅو خبر ورکړی دی.
د سلاموطندار پښتو فېسبوکپاڼه وڅارئ
په خبرپاڼه کې همداراز راغلي چې پر اوکرایین د روسیې د برید له کبله پر دغه هېواد د امریکا او ملګرو هېوادونو له لوري یې د لګښتونو د ډېروالي په اړه خبرې شوي دي.
په همدې حال کې د اوکراین ولسمشر ولودمیر زیلنسکي هم پر خپل ټويټرپاڼه لیکلي چې په دې ټيلیفوني اړیکه کې د اوکراین د وضعیت، د امریکا له لوري د مالي ملاتړ پر دوام او د روسیې پر وړاندې د بندیزونو د دوام په اړه مشورې وشوې.
له دې وړاندې د اوکراین ولسمشر په یوې ویډیويي وینا کې له امریکا څخه وغوښتل چې اوکراین ته د روسیې له لوري جوړې شوې، جنګي الوتکې ورکړي.
په ورته مهال د امریکا د بهرنیو چارو وزیر انتوني بلېنکن له خپل اوکرایني سیال سره د اوکراین او لهستان په پوله کې کتلي دي. د امریکا او اوکراین د مشرانو دغه خبرې داسې مهال کېږي چې پر اوکراین د روسیې برید یوولسمې ورځې ته وغځېد.
سلاموطندار پر ټویټر هم وڅارئ
که څه هم اوکراین او روسیې دواړو د اوکراین په دوو ښارونو کې د ملکیانو د راواېستلو لپاره د اوربند یوې هوکړې ته رسېدلي، خو وروسته اوکرایني چارواکو اعلان وکړ چې دغه اوربند د روسیې له لوري په بشپړه توګه نه دی رعایت شوی.
