د اسلامي همکاریو سازمان په کابل کې د افغانستان لپاره د خپل دفتر د جوړېدو خبر وکړ. دغه سازمان نن (یکشنبه، د کب ۱۵نېټه) په خپل ټویټر کې لیکلي چې د اسلامي همکاریو د سازمان مشر محمدسعید العیاش تېره چهارشنبه په کابل کې خپل دفتر پرانېست.
د اسلامي همکاریو سازمان ویلي چې په کابل کې یې د خپل دفتر د بیا پرانستلو موخه له افغانستان او نړیوالو شریکانو سره د خپلو بشري هڅو همغږي کول دي.
د سلاموطندار پښتو فېسبوکپاڼه وڅارئ
دغه سازمان زياته کړې چې په اسلام اباد کې د اسلامي هېوادونو د وزيرانو په فوق العاده غونډه کې د تصويب شوي پرېکړهليک پر بنسټ به د بشري او مادي منابعو له پلوه پياوړي شي.
دغه سازمان ټینګار کړی چې د افغانستان له خلکو سره په بېلابېلو برخو کې د ملاتړ لپاره خپلې ژمنې به له دې لارې عملي کوي.
په افغانستان کې د اسلامي همکاریو سازمان دفتر په لومړي ځل داسې مهال جوړېږي چې په دغه هېواد کې بشري وضعیت مخ په خرابېدو دی او د نړیوالو سازمانونو له خوا د ناورین د لا خرابېدو خبرداری ورکول کېږي.
سلاموطندار پر ټویټر هم وڅارئ
د اسلامي همکاریو سازمان، په لېندۍ میاشت کې اعلان وکړ چې د دغه سازمان غړو هېوادونو ژمنه کړې چې د اسلامي پراختیايي بانک په ملاتړ به د افغانستان لپاره «بشردوستانه امانتي صندوق» جوړوي.
دغه سازمان د غړو هېوادونو د بهرنیو چارو د وزیرانو د فوق العاده غونډې په پای کې وویل چې دوی له افغانستان سره د بشردوستانه مرستو د رسولو پر څرنګوالي او لارو چارو غږېدلي دي.
