د هرات ګمرک مسوولان وايي چې په تېر یوه کال کې یې ۲۰ میلیارډه افغانۍ عواید ټول کړي او په وینا یې، دغه ریاست کې د فساد مخنیوي سره یې عواید هم لوړ شوي دي.
د هرات ګمرک عمومي رییس محمدبلال سلاموطندار ته ویلي، نه یوازې په دغه ګمرک کې د فساد کچه صفر ته را ټیټه کړې، بلکې د هرات په بندرونو او لویو لارو کې یې د باج اخیستو مخه هم نیولې ده.
د نوموړي په وینا، د تېرو کلونو په پرتله بهر ته د وچې او تازې مېوې، د سکرو ډبرو، د مرمرو ډبرو، د څښاک توکو او غالیو صادرات هم د پام وړ ډېر شوي دي.
هغه زیاتوي، هڅه کوي چې د ګمرک خدمتونه معیاري کړي، څو د سوداګرو د کاروبار او سوداګرۍ لپاره اسانتیاوې برابرې شي.
د هرات ګمرک د دوو سوداګریزو بندرونو په لرلو سره د هېواد په اقتصاد کې ځانګړی ځای لري.
