په روان کال کې وچکالۍ د هېواد لوېدیځې سیمې په ځانګړې توګه بادغیس ولایت ډېر ځپلی او د دغه ولایت اوسېدونکي یې له ګڼو ستونزو سره لاس او ګریوان کړي چې ځينې یې ان اړ کړي، څو خپلې مینې پرېږدي او د بادغیس مرکز قلعهنو ښار ته کډه شي.
د بادغیس ولایت د کرنې اوبو لګولو او مالدارۍ رییس عبدالتواب نایب له سلاموطندار سره په خبرو کې وویل چې د دغه ولایت په مرکزاو ولسوالیو کې د وچکالۍ پراخې نښې او نښانه لیدل کېږي. نوموړي زیاته کړه چې د دغه ولایت د کرنې ریاست ټیم له څو ورځو راهیسې په دې بوخت دی چې بادغیس کې د وچکالۍ کچه معلومه کړي.
د سلاموطندار پښتو فېسبوکپاڼه وڅارئ
د هغه په وینا، په دغه ولایت کې ۶۰زره هکتاره کرنیزه ځمکه باندې للمي غنم کرل شوي وو، خو د بارانونو د نه ورېدو له امله یې سږکال حاصلات نه دي ورکړي.
د بادغیس د کرنې رییس په خبره، په تېرکال او د روان کال په لومړیو کې په دغه ولایت کې ۲۳۰میلي متره ورښت وشو، خو دغه باران د کروندګرو د اړتیا پر وخت نه وو او له همدې امله یې د للمي غنمو کښت ته ګټه ونه کړه.
په ورته مهال د بادغیس ولایت یوشمېر کورندګر په دغه ولایت کې د وچکالۍ له ناورین څخه اندېښنه ښيي او وایي چې سږکال یې له خپلو ځمکو څخه حاصلات نه دي ترلاسه کړي. د بادغیس ولایت یو بزګر غلام مودود وایي، سږکال یې په خپلو کرنیزو ځمکو کې غنم، نخود، او هندوانې کرولې، خو یوه یې هم ښه حاصلات ور نه کړل.
- له وچکالۍ سره د طبيعي پېښو پر وړاندې د مبارزې په چارو کې د دولت وزارت چمتووالی
- طالبانو د بادغیس له ښوونځیو د «هېوادپالنه او د ژوند مهارتونه» مضمونونه لرې کړي
- بادغیس کې د پوځ د درېیمې لوا د ارکان رييس ووژل شو
په همدې حال کې هغه شمېر کورنۍ چې د دغه ولایت له ولسوالیو څخه د وچکالۍ له امله مرکز قلعهنو ښار ته بېځایه شوي، له بېوزلۍ او بېکارۍ شکایت کوي.
په بادغیس ولایت کې د وچکالۍ له امله یوې بېځایه شوې، مېرمن بي بي ګل سلاموطندار ته وویل: «ځای نه لرو، که د ورځې یو ځل اودس وکړو، د دویم ځل لپاره د اودس کولو لپاره ځای نه لرو، په ګرمۍ کې مو لمر سوځوي او په ژمي کې له یخنۍ مرو.»
بلخوا د بادغس ولایت د کډوالو او بېرته راستنېدونکو چارو ریاست مسوولان سلاموطندار ته وایي چې د روان کال له لومړیو تراوسه پورې د دغه ولایت له ولسوالیو څخه مرکز قلعهنو ته د وچکالۍ او ناامنیو له امله ۶۵۰ کورنۍ بېځایه شوي دي.