بادغيس کې امنيتي مسوولان وايي، ياد ولايت کې د ۲۰۷ ظفر قول اردو د درېيمې لوا د ارکان رييس وژل شوی دی.
بادغیس کې د پوځ د درېیمې لوا قومندان حسیبالله مسعود د ياد خبر په تاييد سره وايي، د دغه ولایت د پوځ د درېیمې لوا د ارکان رييس عبدالبصیر نورستاني تېره شپه بالامرغاب ولسوالۍ کې د امنیتي ځواکونو پر کمپ د طالبانو له خوا د هاوان مرمۍ لګېدو پېښه کې وژل شوی.
د مسعور په وينا، دغه راکیټي برید کې ۸ سرتېري ټپیان شوي هم دي چې د ۳ کسانو روغتيايي وضعیت یې ترینګلی دی.
طالبانو تراوسه دې برخه کې رسنیو ته څه نه دي ویلي.
بالامرغاب د بادغیس له ناامنو ولسواليو شمېرل کېږي چې طالبان په کې بېلابېلو برخو پر امنيتي ځواکونو بريدونه کوي.
