تمه ده نن پر افغان سوله د درېو هېوادونو افغانستان، چین او پاکستان د بهرنیو چارو وزیرانو له لوري د ویډیو کنفرانس له لارې درې اړخیزه غونډه جوړه شي. په دې درې اړخېزه غونډه به د درېو واړو هېوادونو د بهرنیو چارو وزیران په دوحه کې د افغان سولې خبرو د بیا ځلې پر پیل سربېره پر یو لړ نورو مسایلو هم خبرې وکړي.
د افغانستان د بهرنیو چارو وزارت وایي چې نن به د بهرنیو چارو وزیر محمد حنیف اتمر، د چین د بهرنیو چارو وزیر وانګ یي او د پاکستان د بهرنیو چارو وزیر شاه محمود قریشي ترمنځ ګډه غونډه جوړه شي چې پر افغان سوله سربېره به د درې واړو هېوادونو پر بېلابېلو موضوعاتو هم خبرې اترې وکړي.
د بهرنیو چارو وزارت ویاند ګران هېواد سلاموطندار ته ویلي، د دغو درېو هیوادونو د بهرنیو چارو وزیران به په افغانستان کې د تلپاتې سولې د ټینګښت لپاره د خبرو پر پیل او سولې ته د رسېدو په موخه پر یوشمېر نورو مسایلو هم خبرې وکړي.
د سلاموطندار پښتو فېسبوکپاڼه وڅارئ
د هېواد په وینا، په دغه غونډه کې به په سیمه کې د لویو پروژو پر پلې کېدو او د سیمې هېوادونو پر نښلېدو هم خبرې وشي او د روغتیایي همکاریو او کورونا ویرووس سره د مبارزې په برخه کې به بحثونه او خبرې وکړي.
هغه وویل: «څلورمه درې اړخیزه ناسته چې د درې واړو هېوادونو ترمنځ جوړېږي، تروریزم سره د مبارزې، د امنیتي همکاریو پراختیا او اقتصادي او سیاسي اړیکو د پیاوړتیا پر بحثونو به تمرکز وي.»
دا په داسې حال کې ده چې د چین د بهرنیو چارو وزارت ویاند هم تېره ورځ یوې خبري ناستې ته ویلې و چې دغه څلورمه ګډه غونډه به د درې واړو هېوادونو د بهرنیو چارو وزیرانو ترمنځ د ویډیو کنفرانس له لارې جوړه شې او پر اړوندو بېلابېلو مسایلو به خبرې او بحثونه وکړي.
