د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بنټ نن د رییسالوزرا له مرستیال عبدالسلام حنفي سره لیدلي دي.
ارګ پر خپلې ټویټرپاڼې لیکلي چې ریچارډ بنټ افغانستان کې د سېکانو او هندوانو په ګډون، د لږکیو د امنیت ټینګښت، د نجونو زدهکړو، د ښځو حقونو او د رسنیو فعالیت په اړه له عبدالسلامي حنفي سره خبرې کړي او ویلي یې دي چې غواړي افغانستان کې د بشري حقونو وضعیت وارزوي.
د ارګ په وینا، د رییسالوزرا مرستیال عبدالسلام حنفي له بنټ سره په لیدنه کې ویلي چې افغانستان کې د تېرو څلورو لسیزو پر مهال بشري حقونه نقض شوي او اسلامي امارت ژمن دی چې له کوم توپیر پرته د ټولو افغانانو ځان، شتمني او عزت وساتي.
عبدالسلام حنفي ټینګار کړی چې اسلامي امارت هغو ټولو نړیوالو میثاقونو او کنوانسیونونو ته ژمن دی چې په وینا یې، د اسلامي اصولو او ملي ګټو خلاف نه وي.
د افغانستان لپاره د ملګرو ملتونو د بشري حقونو ځانګړی راپور ورکوونکی څو میاشتې مخکې هم د بشري حقونو وضعیت ارزولو په موخه افغانستان ته راغلی و. هغه افغانستان ته له سفر وروسته په خپل راپور کې د بشري حقونو وضعیت اندېښمنوونکی بللی و.
خو اسلامي امارت هاغه مهال د ریچارډ بنټ راپور نیمګړی یاد کړی او په خبره یې، نوموړي د افغانستان واقعیتونه پهکې نهدي انعکاس کړي.
