د ملګرو ملتونو ځانګړې استازې ډيبورا لاینز وایي چې دغه سازمان له افغانستان سره د جمهوریت له سقوط راهیسې دوه میلیارډه ډالره مرسته کړې ده.
لاینز نن د افغانستان بانک سرپرست محمدادریس سره په کتنه کې پر بېلابېلو مالي، بانکي او اقتصادي برخو خبرې وکړې او د مرستو په برخه کې یې د بانکي سکتور پر ارزښت ټینګار وکړ.
د سلاموطندار پښتو فېسبوکپاڼه وڅارئ
د افغانستان په چارو کې د ملګرو ملتونو ځانګړې استازې څرګنده کړه چې دغه سازمان په تېرو شپږو میاشتو کې له افغانستان سره ۲ میلیارډه ډالره مرسته کړې. هغې وویل چې د مرستو دا لړۍ به دوام ومومي.
د لاینز په وینا، دغه سازمان هڅه کوي چې له بېلابېلو اړخونو سره د افغانستان د بانکي سکتور د فعالېدو په اړه خبرې وکړي، څو له دې لارې په اسانه توګه خپلو بشري مرستو ته دوام ورکړي.
د یادولو وړ ده چې تر دې مخکې ملګرو ملتونو د افغانستان بازارونو ته د نغدو پیسو د داخلولو لپاره په اوونۍ کې تر ۲۰ میلیونو ډالرو زیاتې پیسې مرکزي بانک ته استولې.
