اسلامي امارت په یوې خبرپاڼه کې ویلي چې د کابل له ښځینه زندان څخه یې ۱۴ښځینه بندیانې چې د بېلابېلو جرمونو په تور زنداني شوې وې، خوشې کړي دي.
خبرپاڼه کې راغلي چې دغه بندیانې یې د بېلابېلو وزارتونو د پنځه کسیزه پلاوي لهخوا د هغوی د دوسیو تر څېړلو وروسته خوشې کړې دي.
د سلاموطندار پښتو فېسبوکپاڼه وڅارئ
د اسلامي امارت د زندانونو چارو د سمون ادارې په خپره شوې خبرپاڼه کې همداراز ویل شوي، د ولایتونو ټولو محکمو ته سپارښتنه شوې چې د ښځینه بندیانو د دوسیو څېړلو ته لومړیتوب ورکړي.
خبرپانه زیاتوي چې د اسلامي امارت د مشر له لوري ټاکل شوی پلاوی به د ټولو ولایتونو په زندانونو کې خپلو څېړنو ته دوام ورکوي.
د اسلامي امارت حکومت دا نه دي ویلي چې دغه ښځینه بندیانې د کومو جرمونو په تور نیول شوې وې.
د اسلامي امارت مشر هبتالله اخندزاده څه موده وړاندې د یوه فرمان له مخې، د هېواد د زندانونو د څېړنې لپاره یو کمېسیون جوړ کړ او دنده یې ور وسپارله چې د ولایتونو ټول زندانونه دې وڅېړي او هغه کسان چې بې ګناه بندیان شوي، له بنده ازاد کړي.
دا په داسې مهال ده چې په تازهګۍ سره کابل کې د څو ښځینه فعالانو د لادرکه کېدو راپورونه ورکړل شوي، خو د اسلامي امارت حکومت د هغوی نیول کېدل رد کړي دي.
