ټاکل شوې د افغانستان په اړه د دغه هېواد د ګاونډیو هېوادونو د بهرنیو چارو وزیرانو درېیمه ناسته د روان میلادي کال د مارچ میاشتې په وروستیو اوونیو کې د چین په پلازمېنه پکن کې جوړه شي.
د پاکستان د بهرنیو چارو وزیر شاهمحمود قریشي چې د دغه هېواد له لومړي وزیر سره یوځای په څلور ورځني سفر چین ته تللي، یوې خبري ناسته کې وویل چې پکن او اسلاماباد د سیمې همکاریو په ځانګړې توګه له افغانستان سره د مرستو په برخه کې مهمو هوکړو ته رسېدلي دي.
د سلاموطندار پښتو فېسبوکپاڼه وڅارئ
پاکستاني رسنیو د دغه هېواد د بهرنیو چارو وزیر له قوله رپوټ ورکړی چې د افغانستان د ګاونډیو هېوادونو درېیمه ناسته به د مارچ په وروستۍ اوونۍ کې په چین کې جوړه شي.
قریشي زیاته کړې ټاکل شوې چې د اسلامي امارت د بهرنیو چارو وزیر هم د افغانستان د ګاونډیو هېوادونو د بهرنیو چارو وزیرانو د ناستې په وروستۍ ورځ کې ګډون وکړي، څو دغه هېوادونه افغانستان کې له وروستیو تحولاتو خبر شي.
د قریشي په وینا، د پاکستان، افغانستان او چین هېوادونو د ګډې مجمع پر جوړېدو هم هوکړه شوې، څو د متقابلو هکاریو د پراختیا لپاره اغېزمن ګامونه واخیستل شي. د افغانستان د ګاونډیو هېوادونو د بهرنیو چارو وزیرانو لومړۍ ناسته د وږي په ۱۷ د پاکستان په کوربهتوب جوړه شوه او دویمه هغه یې بیا ایران کې جوړه شوې وه.
په یادو دواړو ناستو کې د افغانستان ګاونډیو هېوادونو دغه هېواد کې د ناورین له منځه وړلو لپاره پر سیاسي حل لار، پراخبنسټه حکومت جوړېدو او د بشري مرستو پر لېږد ټينګار کړی.
د چین او پاکستان مشرانو په ایران او پاکستان کې د دغو ناستو پایلې ګټور بللي او چین کې یې د جوړېدونکې درېیمې ناستې د مثبتو اغېزو په اړه هیلهمندي څرګنده کړې ده.