د پاکستان لومړی وزیر شهباز شریف وايي، نړۍ باید افغانستان کې د وضعیت ښهوالي په موخه له یوه بل سره همکاري وکړي او افغانستان باید له پامه ونه غورځول شي.
نوموړي دغه څرګندونې نن جمعه د ازبکستان په سمرقند ښار کې د شانګهای همکاریو سازمان د غړیو هېوادونو د مشرانو په غونډه کې کړي دي.
د سلاموطندار پښتو فېسبوکپاڼه وڅارئ
شهباز شریف ټينګار کړی، که نړۍ داځل افغانستان هېر کړ، لویه تېروتنه به یې کړې وي.
د پاکستان لومړي وزیر همداراز ویلي چې نړۍ باید د افغانستان د اقتصاد پیاوړتیا لپاره کار وکړي او روان وضعیت ته په کتو اړتیا ده چې د یاد هېواد کنګل شوې شتمني ازاده کړل شي.
د پاکستان لومړي وزیر دې غونډه کې په ټینګار وویل چې پاکستان د افغانستان ګاونډی هېواد دی او دغه هېواد کې سوله پاکستان کې د امن او سولې په معنی ده.
نوموړي وویل: «هغه څه چې د افغانستان لپاره ښه دي، د پاکستان لپاره هم ښه دي»
شهباز شریف زیاته کړې چې د شانګهای همکاریو سازمان باید له افغانستان څخه له ترهګرۍ سره پر مبارزې سربېره په اقتصادي برخه کې هم ملاتړ وکړي.
نوموړي همداراز دې غونډه کې د خپلو خبرو پرمهال په پاکستان کې د وروستیو سېلابونو له کبله اوښتو زیانونو ته په اشارې سره وویل چې سېلابونو دغه هېواد ته ملیارډونه ډالر زیان اړولی دی.
