د بلخ په ولسوالیو کې د درملو او نورو امکاناتو نه موجودیت هغه ستونزه ده چې له کبله یې سلګونه ناروغان او د هغوی پایوازان مزارشریف ښار ته راغلي او دلته هم د ډاکټرانو او مسوولانو نه پام له ستونزو سره مخ کړي دي.
مرتضی چې خپله مور یې د شولګرې ولسوالي له یوه کلي نه ښار ته راوستلې وايي، نه یوازې په کلي کې یې ډاکټر او درمل نشته، بلکې په مزارشریف کې هم د بیروبار ترڅنګ، درمل او ډاکټر نه پیدا کېږي او په خبره یې، درمل هم په خپلو پیسو پېري.
د سلاموطندار پښتو فېسبوکپاڼه وڅارئ
عبدالصبور بیا د بلخ له چهارکنت ولسوالي نه خپله مېرمن د درملنې لپاره مزارشریف ښار ته راوستلې ده. هغه وايي، په ولسوالي کې یې درمل نشته او طالبان باید د خلکو ستونزې حل کړي.
د بلخ د عامې روغتیا رییس شیخ میر صدام هم د خلکو ستونزې مني او وايي، خلک ترې ښه خدمتونه غواړي، خو دغه روغتون د درملو او نورو امکاناتو له کمښت سره مخ دی.
د نوموړي په وینا، سره له دې چې خلک اړ دي، څو په دولتي روغتون کې درملنه وکړي، خو دوی هم لازم امکانات نه لري.
نړیوالې ټولنې پر هېواد د طالبانو له واکمنېدو وروسته پر افغانستان خپلې مرستې درولي او نړیوال سازمانونو د افغانستان د روغتیايي نظام د ګډوډېدو خبرداری ورکړی دی.
