د روغتیا نړیوال سازمان ویلي چې د اګېسټ میاشتې له پیل راهیسې په ټول افغانستان کې د کورونا ویروس کتل او د دغه ویروس د واکسین ورکول کم شوي دي. دغه سازمان په یوه ټویټ کې لیکلي، په افغانستان کې د کورونا ۱،۶ میلیونه ډوزه واکسین زېرمه شوی او که ژرترژره ونه کارول شي، نېټه به یې تېره شي.
د روغتیا نړیوال سازمان ویلي چې له نورو همکارانو سره یوځای د افغانستان په شپاړلس ولایتونو کې د کورونا د کتلو او د دغه ویروس د واکسین ورکولو د کچې پر زیاتوالي کار کوي.
د سلاموطندار پښتو فېسبوکپاڼه وڅارئ
دغه سازمانه زیاته کړې چې د کورونا ویروس د کتلو ۵۰ زره کڅوړې د هوا له لارې افغانستان ته لېږدول شوي، څو د کورونا د ځانګړو مرکزونو اړتیاوې پوره شي. د روغتیا سازمان په خبره، ۱۵۰ زره نورې کڅوړې به هم ډېر ژر افغانستان ته ورسېږي.
د روغتیا سازمان ویلي چې په نیمروز او کونړ کې یې د کورونا نمونو د کتلو ځانګړي مرکزونه جوړ کړي او په پروان، لغمان او کاپیسا کې یې هم پر جوړوېدو کار روان دی.
په هېواد کې د طالبانو له واکمنېدو سره سم د کورونا ویروس د شکمنو نمونو د کتلو او د دغه ویروس د واکسین ورکولو بهیر ګډوډ شوی دی. دا په داسې حال کې ده چې د روغتیا نړیوالو سازمانونو هم د افغانستان روغتیايي سېسټم د ګډوډېدو خبرداری ورکړی دی.
