د افغانستان بشري وضعیت لپاره د ملګرو ملتونو ځانګړي رپورټر ریچارډ بنیټ، د هېواد په یوشمېر ولایتونو کې پر ښوونځیو او جوماتونو ترهګریزو بریدونو وروسته ویلي چې د افغانانو د بشري حقونو وضعیت باید خوندي شي.
نوموړي پر خپل ټویټرپاڼه لیکلي چې د تېرې اوونۍ د خونړیو بریدونو له امله د وژل شویو کسانو له کورنیو سره څنګ کې ولاړ دی.
د ملګرو ملتونو ځانګړي رپورټر زیاته کړې چې خپلې ارزونې، څېړنې او ځواب ویلو ته به دوام ورکړي. نوموړي همداراز د تاوتریخوالي مخنیوي او د نړیوال عدالت پر تضمین ټينګار کړی دی.
دا په داسې حال کې ده چې د سېشنبې سهار د وري میاشتې دېرشمه د کابل لوېدیځه سیمه د درېوو پرلهپسې چاودنو شاهده وه.
لومړۍ چاودنه د «ممتاز» ښوونیز مرکز مخې ته او دوه نورې چاودنې بیا د «عبدالرحیم شهید» ښوونځي ته څېرمې وشوې چې په دغو چاودنو کې نږدې ۳۰ زدهکوونکي ووژل شول.
له کابل وروسته بلخ او کندوز هم د مرګونو بریدونو شاهدان وو. یادو ولایتونو کې پر لمونځ کوونکو چاودنې وشوې چې لسګونه کسانو ته یې مرکژوبله واړوله.
د سلاموطندار پښتو فېسبوکپاڼه وڅارئ
دغو بریدونو پراخ کورني او بهرني غبرګونونه له ځان سره لرل. له دې سربېره، په هېواد کې وروستیو ناامنیو د افغانانو اندېښنې راپارولي دي او د اسلامي امارت حکومت په دې برخه کې په ناغېړۍ تورنوي.
