د اسلامي امارت ویاند ذبیحالله مجاهد یوه اعلامیه کې ویلي، د دفاع وزارت د مرستیال ملا محمدفاضل په مشرۍ یې د کورنیو چارو او دفاع وزارتو او د استخباراتو ریاست ځواکونو د کابل او څو نورو نیږدې ولایتونو په ځينو سیمو کې پراخ چاڼیز عملیات پيل کړي دي.
د اسلامي امارت د بهرنیو چارو وزارت یوه اعلامیه کې ویلي چې اوکراین کې وضعیت له نیږدې څاري او احتمالآ جګړه کې د تلفاتو رامنځ ته کېدو ته اندېښمن دي.
د بهرنیو چارو وزارت ویاند عبدالقهار بلخي نن (جمعه د کب په شپږمه) یوه خبرپاڼه کې د جګړې له ښکېلو خواوو د زغم غوښتنه کړې ده.
د غور د استیناف څارنوالي ریاست چارواکي وايي، پر هغه هلک او نجلۍ يې شرعي حدود پلي کړي چې د نامشروع اړیکې په تور نیول شوي وو. دوى وايي، ياد هلک او نجلۍ يې نن د غور په مرکز فېروزکوه ښار کې په دُرو وهلي دي.
د غزني د اطلاعاتو او فرهنګ ریاست ښوونیز مرکز چې د اسلامي امارت له واکمنېدو وړاندې یې د امریکا سفارت په ملاتړ د «لنکن ښوونیز مرکز» په نوم فعالیت درلود، اوس دغه ولایت کې د ملکي او د اسلامي امارت ځواکونو لپاره د عصري زدهکړو په مرجع بدل شوی دی.
د اسلامي امارت د کورنیو چارو وزارت د کابل امنیې قومنداني ته په یوه پنځه مادهییز لارښود کې سپارښتنه کړې چې له دې وروسته پلازمېنه کابل کې د اسلامي امارت سرتیري اجازه نه لري چې په یوه او بل پلمه د خلکو کورونه وپلټي. لارښود کې راغلي، د اسلامي امارت سرتیري دې د خپلو دندو پرمهال له ښاریانو سره ښه چلن وکړي.
د اسلامي امارت د صفونو د تصفیې کمېسیون مسوولان وايي چې د یاد کمېسیون له جوړېدو راهیسې یې د اسلامي امارت له لیکو څخه د ۱۳۵ کمعمره ځوانانو په ګډون ۴۳۵۰ نامطلوبه کسان اېستلي دي. نوموړي زیاته کړه، هغه ځواکونه چې د دندو پرمهال د تلاشۍ ځایونو کې له ستونزې پرته پر موټرو ډزې کوي، د دوی د ظرفیت پر ټيټوالي او پر نه روزنې دلالت کوي.
رویټرز خبري اژانس رپوټ ورکړی چې پاکستان د افغانستان خاورې ته نږدې د ډیورنډ فرضي کرښې ته څېرمه د دغه هېواد د سختدریځو او بېلتونپاله ډلو پر وړاندې پوځي عملیات زیات کړي دي. رویټرز د پاکستان د پوځ په حواله ویلي، د پاکستان او افغانستان ترمنځ ډیورنډ کرښې ته نږدې سیمو کې د سختدریځو بریدونه ډېر شوي دي.
په افغانستان کې د ملګروملتونو استازولي یا یوناما د هغو دوو خبریالانو له خوشې کېدو هرکلی کړی چې د کډوالو په چارو کې د ملګروملتونو سازمان عالي کمېشنرۍ سره یې کار کاوه او د اسلامي امارت له لوري نیول شوي وو. یوناما ټینګار کړی، هغه وخت رارسېدلی چې خپلسره نیونو پای ته ورسېږي او هغه کسان چې بې ګناه بندیان شوي ازاد دې شي.
د افغانستان لپاره د روسيې ځانګړي استازي ضمير کابلوف ويلي، که اسلامي امارت د بشري حقونو او ټولشموله حکومت رامنځته کولو کې اقدام وکړي، روسیه د اسلامي امارت په رسمیت پېژندلو کې همکاري کولی شي.
هغه زیاتوي، چې د بشري حقونو رعایتول، د ټولشموله حکومت جوړول او ښځینهوو ته د کار او زدهکړو اجازه ورکول د نړیوالې ټولنې مهم شرطونه دي.
د اسلامي امارت کابینې د رییسالوزرا محمدحسن اخند په مشري نن په خپله دوهویشتمه ناسته کې معلولانو، یتیمانو او کونډو ته د مرستو په اړه د شهدا او معلولانو وزارت طرحه تصویب کړې ده.
ټاکل شوې د افغانستان په اړه د دغه هېواد د ګاونډیو هېوادونو د بهرنیو چارو وزیرانو درېیمه ناسته د روان میلادي کال د مارچ میاشتې په وروستیو اوونیو کې د چین په پلازمېنه پکن کې جوړه شي.
د اسلامي امارت ویاند او د اطلاعاتو او فرهنګ وزارت د نشراتو معین ذبیحالله مجاهد نن کابل کې د یوې غونډې پرمهال وویل چې له دې وروسته به له کوم خنډ او ځنډ پرته ټولو دولتي کارکوونکو ته هره میاشت پر خپل وخت معاشونه ورکول کېږي.
د ملګروملتونو امنیت شورا په یوه رپوټ کې ویلي چې اسلامي امارت په افغانستان کې د ترهګرو ډلو د فعالیتونو محدودولو لپاره هېڅ ډول اقدامات نه دي کړي. رپوټ کې ټينګار شوی چې له زندان څخه د داعش خراسان څانګې د څو زرو سرتېرو له ازادېدو وروسته اوس د یادې ډلې د جنګیالیو شمېر له ۲۲۰۰ څخه ۴۰۰۰ کسانو ته لوړ شوی دی.
د اسلامي امارت د اقتصاد وزارت چارواکيو په شفافه توګه د بشري مرستو وېشلو په موخه د اته مادهایزې طرحې د جوړوېدو خبر ورکړ.
د بېپولې خبریالانو سازمان د افغان خبریالانو پر وړاندې د ګواښونو له داوم څخه د تازه رپوټ په خپرولو سره اندېښنه ښوولې او ویلي، دې وروستیو دوو میاشتو کې د خبریالانو احضار او خپلسره نیونې زیاتې شوي دي.
دغه سازمان ټینګار کړی، چې د اسلامي امارت واکمنېدو راهیسې، د خبریالانو او د رسنیو کارکونکو د نیولو ۵۰ موارده ثبت شوي.
اسلامي امارت په یوې خبرپاڼه کې ویلي، د کابل له ښځینه زندان څخه یې ۱۴ښځینه بندیانې چې د بېلابېلو جرمونو په تور بندیانې شوې وې، خوشې کړې دي. د زندانونو چارو د سمون ادارې په خپره شوې خبرپاڼه کې همداراز ویل شوي، د ولایتونو ټولو محکمو ته سپارښتنه شوې چې د ښځینه بندیانو د دوسیو څېړلو ته لومړیتوب ورکړي. د اسلامي امارت حکومت دا نه دي ویلي چې دغه ښځینه بندیانې د کومو جرمونو په تور نیول شوې وې.
د سلاموطندار په اړه
نشراتي سیاست او مسلکي اصول
د خصوصي حریم سیاست
له موږ سره اړیکه
کارموندنه
د معلوماتو او سندونو لېږل
له موږ سره د همکارۍ شرایط
شکایت
راډیويي خپرونې
فلم او تصویر
آر اس اس
په خبرپاڼه کې ګډون
