د عامې روغتیا وزارت وايي چې له څه مودې راهیسې په ټول هېواد کې هره اوونۍ نږدې ۳۰ کسان د تنفسي ناروغیو له امله خپل ژوند له لاسه ورکوي.
د عامې روغتیا وزارت ویاند شرافت زمان پرون سهشنبه د تلې ۱۹مه سلاموطندار ته ویلي چې په دې وروستیو کې هره اوونۍ هېواد کې له ۲۰ تر ۳۰ کسان د تنفسي ناروغیو له کبله مړه کېږي.
نوموړي زیاته کړې چې د موسم په بدلېدو سره روغتونونو ته د سراپا ناروغانو شمېر ډېر شوی دی. شرافت زمان ډاډ ورکوي چې د عامې روغتیا وزارت هڅه کوي، څو هغو ناروغانو ته د درملنې زمینه برابره کړي چې له تنفسي ناروغیو کړېږي.
د یادونې وړ ده چې د ژمي په رارسېدو سره هېواد کې په ځانګړې توګه کابل کې د ککړې هوا د کچې په لوړېدو، ګڼشېمېر هېوادوال پر تنفسي ناروغیو اخته کېږي.
د مخکیني حکومت د ورکړل شویو شمېرو له مخې، هر کال هېواد کې پنځه زره کسان د تنفسي او زړه ناروغیو له کبله خپل ژوند له لاسه ورکوي.
همداراز د مخکیني حکومت پرمهال هر کال کابل کې ۳۵۰۰ کسان د ککړې هوا له کبله مړه کېږي.
