د کندهار ولایت یوشمېر اوسېدونکي وايي، په دې وروستیو کې دغه ولایت کې د وزګارتیا کچه لوړه شوې او ګڼشمېر کورنۍ د خوړو لپاره څه نهلري.
دوی وویل، که څه هم کندهار کې پر بېوزلۍ کورنیو د مرستو د وېش لړۍ چټکه شوې، خو دا مرستې د اوږد وخت لپاره د خلکو ستونزې نه شي حل کولای.
د سلاموطندار پښتو فېسبوکپاڼه وڅارئ
د کندهار اوسېدونکی مطيعالله وايي، دولت او مرسته کوونکي بنسټونه دې خلکو سره د مرستو پر ځای، هغوی ته د کار زمينه برابره کړي.
نوموړي سلاموطندار ته وویل: «کله چې اسلامي امارت راغی ورځ تر بلې د وزګارتیا کچه لوړېږي، خلک ټول ورځ په تمه ناست وي، که يو څوک ورسره مرسته وکړي، که ځوانانو ته د کار زمينه برابره شي، هېڅکله به خيراتونو ته په تمه نهوي، باید خلکو ته د کار زمينه برابره شي.»
د هغوی په وینا، د بې روزګارۍ کچې لوړېدل د ټولنې په امنیتي او ټولنیز وضعیت هم ناوړه اغېز لري.
ورته وخت کې کندهار کې د موسسو مسوولان وایي، هڅه کوي اړمنو خلکو ته د کار زمینه برابره کړي او د کار په بدل کې هغوی ته پيسې یا هم خوراکي توکې ورکړي.
کندهار کې د «Serve Afghanistan» موسسې مسوول عبدالطیف حمیدي وویل: «موږ چې دلته فعاليت کوو غواړو ځوانانو ته د کار زمينه برابره کړو او د هغو ځوانانو د استعدادونو څخه ګټه واخلو چې ددي وطن د ابادۍ فکر لري.»
د کندهار د اقتصاد رییس عبدالسلام بریالي هم سلاموطندار ته وويل، هڅه کوي ښځو او نارینهوو ته د بنسټیزو او دوامداره کارونو زمینه برابره کړي، څو وکولای شي د خپلو کورنیو لپاره حلاله نفقه برابره کړي.
هېواد کې د وزګارتیا کچه تر وروستیو سیاسي بدلونونو وروسته لوړه شوه چې له امله یې زرګونه کسان اړ شوي نورو هېوادونو ته کډوال شي.
