د افغانستان برښنا شرکت اعلان کړی چې د ازبکستان د برښنا په یوه دستګاه کې د تخنیکي ستونزې د حل وروسته له ازبکستان څخه د برښنا د واردولو بهیر بېرته عادي حالت ته راګرځېدلی دی.
د برشنا شرکت په یوه خبرپاڼه کې ویلي چې د ازبکستان د تیلي مرجان برښنا دستګاه کې تخنیکي ستونزه حل شوې او له دغه هېواد څخه افغانستان ته وارداتي برښنا نن سهار شاوخوا ۷ بجې بېرته وصل شوه.
د سلاموطندار پښتو فېسبوکپاڼه وڅارئ
دغه شرکت زیاته کړې چې د برښنا په دې دستګاه کې د تخنیکي ستونزې له امله ازبکستان د برښنا له کمښت سره مخ شوی و چې له امله یې افغانستان ته د برښنا واردات کم شوي وو.
دغه شرکت ټینګار کړی چې له دې وروسته لنډ مهاله پرچاوي به د برښنا د کمښت او په کورنیو کې له اندازې زیات د برښنا کارولو له امله وي.
برشنا شرکت پرون د یوې اعلامیې په خپرولو سره وویل چې ازبکستان له دغه شرکت سره له همغږۍ پرته د برښنا واردات ۶۰ سلنه کم کړي چې له امله یې کابل او یو شمېر ولایتونه د برښنا له کمښت سره مخ دي.
