د سوېل ختیځ زون په پکتیکا او خوست ولایتونو کې د بېګانۍ زلزلې له ۲۹۵ کسان مړه شوي او نږدې ۶۰۰ کسان ټپیان شوې دي.
د باختر خبري اژانس د خبر له مخې، د پکتیکا نکې، زیړوک، برملې او ګیان ولسوالیو کې د شوې زلزلې له امله ۲۵۵ کسان مړه شوي او څه باندې ۵۰۰ کسان ټپیان دي.
د سلاموطندار پښتو فېسبوکپاڼه وڅارئ
په ورته مهال باختر خبري اژانس ویلي چې د شوې زلزلې له امله د خوست د سپیرې ولسوالي په افغان دوبۍ سیمه کې ۴۰ کسان مړه شوي او ۹۵ نور ټپيان شوې دي.
په همدې حال کې د خوست او پکتیکا ولایتونو ځايي چارواکي وايي چې د زلزلې له امله ځپل شویو سیمو ته روغتیايي او مرستندویه ډلې استول شوې دي.
په ورته مهال د اسلامي امارت سرپرست حکومت له نړیوالو بنسټونو غوښتي دي چې د خاورو او ویجاړو شویو کورونو څخه د خلکو د رایستلو په برخه کې مرسته ورسره وکړي.
سرپرست حکومت همداراز ویلي چې پکتیکا او خوست ولایتونو ته یې د مرستندویه ډلې او چورلک لېږلي او دا مهال د مړیو او ټپیانو په را ایستلو لګیا دي. دوی همداراز ویلي چې د مرستندویه ډلو له لوري روغتون ته د ټپیان لېږد روان دی.
د امریکا د جیولوژي اداره وایي چې د چهار شنبې په لومړنیو ساعتونو کې د ریکټر په کچه ۶.۱ درجې زلزلې د افغانستان او پاکستان یوشمېر سیمې ولړزولې.
دا اداره زیاتوي چې زلزله د خوست ښار په شاوخوا ۴۴ کیلومتري کې د ځمکې په ۵۱ کیلومتره ژورتیا کې شوې ده.
راپورونه وایي زلزله د افغانستان او پاکستان په شاوخوا ۵۰۰ کیلومتره ساحه کې احساس شوې ده. په ټولنیزو رسنیو کې د یو شمیر کسانو په وینا، دا زلزله په کابل او اسلام آباد کې هم خلکو احساس کړې ده.
