ولسمشر محمداشرف غني او ورسره مل پلاوي پرون له غرمې وروسته په واشنګټن کې د ډیموکراټانو د اکثریتو له مشر سناتور چارلز شومر او د جمهوري غوښتونکو د لږکیو له مشر سناتور میچ مکانیل او یوشمېر نورو سناتورانو سره ولیدل. میچ مکانیل له دغې لیدنې وروسته ویلي، هیله لري چې د بایډن دولت به له افغانستانه د امریکايي ځواکونو د را اېستلو لړۍ وځندوي.
د نوموړي په وینا، له افغانستانه د امریکايي ځواکونو د را اېستلو په اړه د بایډن پرېکړه د ګواښونو پر وړاندې د امریکا افغان شریکان یوازې پرېږدي. مکانیل زیاته کړې چې د بایډن سلاکار هم دا موضوع مني چې دا پرېکړه به بدې پایلې ولري.
د سلاموطندار پښتو فېسبوکپاڼه وڅارئ
دغه مهم امریکايي سناتور وايي چې طالبانو د امریکايي ځواکونو د راوتلو له پرېکړې وروسته جرات پیدا کړی او غواړي د ښځو په ګډون، په بېلابېلو برخو کې شته لاستهراوړنې او پرمختګونه شا ته وغورځوي او د کابل د نیولو لپاره هڅه کوي.
- شنونکي: امریکا ته تللی افغان پلاوی د افغانستان د ملي دریځ د دفاع وړتیا نه لري
- کندوز کې د جګړې دوام، په یوه اوونۍ کې ۲۱ملکیان وژل شوي او ۲۲۵ ټپیان دي
- جوزجان کې د پولیسو د پنځم سمت آمره د جګړې لومړۍ کرښې ته تللې
میچ مکانیل زیاتوي، داسې ډېرې نښې نښانې شته، څومره چې د امریکايي ځواکونو تر راوتلو وروسته د افغانستان له لاسه وتل دردناک دي، د مخنیوي وړ هم دي. دغه امریکايي سناتور وايي، القاعده غواړي یو ځل بیا په مغرورتیا سره را ژوندۍ شي او څنګه چې د امریکا د دفاع وزیر ویلي، ښايي دا شبکه تر راتلونکو دوو کلونو پورې بیا هم امریکا ته ګواښ پېښ کړي.
دا په داسې حال کې ده چې په افغانستان کې لا هم د ترهګرۍ ګواښ له منځه نه دی تللی او ټاکل شوې بهرني ځواکونه د روان زېږدیز کال د سپټمبر تر یوولسمې افغانستان پرېږدي.
له افغانستانه د امریکايي ځواکونو د وتلو له اعلان سره سم په هېواد کې د طالبانو بریدونو او جګړې زور اخیستی او په تېرو څو اوونیو کې ځینې ولسوالۍ هم نیولې دي.
ولسمشر غني او ورسره مل پلاوی د چهارشنبې په ماښام له کابله واشنګټن ته وخوځېدل او پرون ورسېدل. دغه سفر د امریکا د ولسمشر جو بایډن په بلنه شوی دی.
د یادونې ده چې له ولسمشر محمداشرف غني سره په دغه سفر کې د ملي روغې جوړې شورا رییس عبدالله عبدالله، د ولسمشر لومړی مرستیال امرالله صالح، د بهرنیو چارو وزیر محمدحنیف اتمر، د ملي امنیت سلاکار حمدالله محب، د ولسمشر سلاکار وحید عمر، د سولې مرکچي پلاوي غړي عبدالمتین بېګ، حبیبه سرابي، فاطمه ګیلاني او د بشري حقونو خپلواک کمېسیون رییسه شهرزاد اکبر ملتیا کوي.
