د خصوصي پوهنتونونو اتحادیې د رسنیو برخې مسوول محمدکریم ناصري د خصوصي پوهنتونونو د وضعیت په اړه اندېښنه ښيي او وايي، د جمهوریت له سقوط او د طالبانو له واکمنېدو وروسته په دغو پوهنتونونو کې د نوملیکنې کچه ۶۰ سلنه را کمه شوې ده.
د هغه په وینا، که څه هم خصوصي پوهنتونونو د ټولو تحصیلي دورو فیس د پام وړ کم کړی، خو بیا هم څوک نوملیکنه نه کوي.
د سلاموطندار پښتو فېسبوکپاڼه وڅارئ
د خصوصي پوهنتونونو یوشمېر زدهکړیالانو هم سلاموطندار ته ویلي چې د سیاسي بدلونونو له راتلو وروسته یې په ټولګیو کې د زدهکړیالانو شمېر کم شوی دی.
د یوه خصوصي پوهنتون زدهکړیاله شکېبا ابراهیمي په هېواد کې د لوړو زدهکړو وضعیت ناهیلی کوونکی بولي.
شکېبا وايي، د اسلامي امارت په نظام کې د ځوانانو، په تېره د ښځینهوو برخلیک ناڅرګند دی او همدا لامل دی چې نجونې او هلکان په خصوصي پوهنتونونو کې د پیسو په بدل کې زدهکړو ته زړه نه ښه کوي.
یوه بله زدهکړیاله مهریه وايي، د هېواد ګونګ وضعیت او اقتصادي ستونزو یې ګڼشمېر ټولګیوال د زدهکړو پرېښودو ته اړ کړي دي. هغه وايي، ځوانان، په تېره نجونې د زدهکړو روحیه نه لري او نه یې هم کومه هیله ورسره تړلې ده.
اسلامي امارت پر هېواد له واکمنېدو وروسته په پوهنتونونو کې د جنسیتي تفکیک طرحه وړاندې کړه چې پر بنسټ یې، نجونې او هلکان باید په جلا جلا ټولګیو او وخت کې زدهکړې وکړي. اوس سره له دې چې د اسلامي امارت له راتګ څخه څه باندې درې میاشتې تېرېږي، خو بیا هم دولتي پوهنتونونه رخصت دي او خصوصي هغه هم له ناسم وضعیت سره مخ دي.
