د مالیې وزارت اړوند د ګمرکونو او عوایدو معینیت مسوولانو نن د یوې خبري ناستې پر مهال وویل چې په تېرو ۷۸ ورځو کې یې د هېواد په کچه نږدې ۲۷ملیارده افغانۍ عواید راټول کړې دي.
د مالیې وزارت د ګمرکونو او عوایدو رییس معراج محمد معراج په دغه خبري غونډه کې وویل چې د اسلامي امارت له واکمنېدو راهیسې دوی په ټول هېواد کې د عوایدو د راټولو په برخه کې خپل فعالیتونه تنظیم کړي او په نږدې دوه نیمو میاشتو کې یې د دولت خزانې ته ۲۶ میلیارده او ۹۱۵ میلیونه افغانۍ راټولې کړې دي.
د سلاموطندار پښتو فېسبوکپاڼه وڅارئ
د ګمرکونو او عوایدو رییس څرګنده کړه چې دغه عواید یې د یوه مکانیزم له لارې راټولې کړي او له دې وروسته به هم د ګمرکونو عواید په شفافه توګه راټولوي.
په همدې حال کې معراج وویل چې دوی د حشر او ذکات راټولو پر یوه پلان کار کوي چې له مخې به یې په هېواد کې د بېوزلۍ او لوږې مخه نیول کېږي.
بلخوا د ګمرکونو او عوایدو رییس معراج محمد معراج د هېواد په ګمرکونو کې په غیرمسوولانه توګه د عوایدو د راټولو په اړه وویل چې دوی د دې کار مخه نیولې او هېچا ته به اجازه ورنه کړي، څو د دولت عواید شخصي جېبونو ته واچوي.
هغه همداراز زیاته کړه چې د ګمرکونو او عوایدو راټولو په برخه کې له شته امکاناتو او سیستم څخه به د عوایدو د راټولو په برخه کې کار واخلي او د پرمختګ زمینه به ورته برابره کړي. نوموړي څرګنده کړه چې په دې برخه کې به شته ستونزې هواروي او له نوې ټنکالوژۍ څخه د عوایدو په راټولو کې ګټه اخلي.
په همدې حال کې د مالیې وزارت ویاند په دغه غونډه کې د دولتي کارکوونکو د درېوو میاشتو د معاشونو له ورکړې څخه خبر ورکوي. د مالیې وزارت ویاند احمد ولي حقمل وايي، دغه وزارت سر له نن څخه د دولتي کارکوونکو د وږي، تلې او لړم میاشتې د معاشونو د ورکړې چارې پیل کړي او د درېوو میاشتو معاشونه به پر یوه وخت ورکول کېږي.
دا په داسې حال کې ده چې د طالبانو له واکمېدو راهیسې ګنشمېر افغانانو خپلې دندې له لاسه ورکړي او له ګڼو اقتصادي ستونزو سره لاس او ګرېوان دي. د نړیوالو مرستندویه بنسټونو د رپوټونو له مخې، د افغانستان د نفوس نیمايي وکړي د خوړو له کمښت سره مخ دي او که چېرته دغه وضعیت دوام وکړي، په را روان ژمي کې به دغه هېواد له یوه ستر بشري ناورین سره مخ شي.
