ولسي جرګې د ۱۴۰۰ مالي کال بودیجې له دوه ځله ردولو وروسته بالاخره نن دا بودیجه د رایو په ډېروالي سره تصویب کړه.
د ولسي جرګې د مالي او بودیجې کمېسیون غړي وايي چې د ۱۴۰۰ مالي کال د بودیجې په درېیمه مسوده کې د دې جرګې د غړیو ډېری غوښتنې او وړاندیزونه په پام کې نیول شوي دي.
د دوی په وینا، د ښوونکو او ټیټپوړو دولتي کارکوونکو په معاشونو کې دوه زره افغانۍ ډېروالی، د ملي روغې جوړې شورا او د تېلو او ګازو ادارې لپاره د بودیجې نه ځانګړي کېدل، د ملي دسترخوان پروګرام لرې کېدل او د ولسمشرۍ ماڼۍ عملیاتي ادارې ته د بودیجې په پام کې نه نیول کېدل هغه ستر بدلونونه دي چې په دې طرحه کې ځای پر ځای شوي دي.
د ولسي جرګې رییس میررحمان رحماني وايي چې د راتلونکي کال له وري میاشتې به د ښوونکو او ټیټپوړو دولتي کارکوونکو معاشونه به ۲ زره افغانۍ ډېر شي.
ولسمشر محمداشرف غني له ولسي جرګې نه د بودیجې د تصویب له کبله مننه کړې او دا پرېکړه یې پر خپل وخت د دولت د بنسټیزو پرواګرمونو، په تېره په ټول هېواد کې د پراختیايي پروژو د پلي کېدو لپاره اغېزناکه بللې ده.
ولسي جرګې تر دې وړاندې د پروژو نامتوازنوالي له کبله او د ټیټپوړو دولتي کارکوونکو د معاشونو لوړوالي په موخه دوه ځله د ۱۴۰۰ مالي کال بودیجه رد کړه.
د ۱۴۰۰ مالي کال بودیجه ټولټال ۴۷۳ میلیارډه افغانۍ ده چې ۳۱۱ میلیارډه او ۵۰۶ میلیونه یې عادي او ۱۶۱ میلیارډه او ۵۳۵ میلیونه یې هم پراختیايي ده.
