د افغانستان د ازادو رسنیو د ملاتړ ټولنه یا نی وايي، په ۲۰۲۰ کال کې د خبریالانو پر وړاندې تاوتریخوالی ۲۳ سلنه ډېر شوی دی. دغې ټولنې نن په خپل کلني راپور کې اندېښنه ښودلې چې په هېواد کې د رسنیو وضعیت ناسم لوري ته روان دی.
د افغانستان د ازادو رسنیو د ملاتړ ټولنې رییس عبدالمجیب خلوتګر وايي، له ۲۰۲۰ کال راهیسې د خبریالانو پر وړاندې د تاوتریخوالي ۱۱۳ پېښې چې ۱۶ یې د وژنو، ۱۵ د ټپیانېدو، ۴ د نیول کېدو، ۱۶ د وهلو ډبولو، ۴۸ د سپکاوي، ۳ د تښتونې، ۷ د په نښه کېدو، ۲ پر کورنۍ د برید او یوه هم د انسان تښتونې د هڅې دي، له دغې ټولنې سره ثبت شوې دي.
د سلاموطندار پښتو فېسبوکپاڼه وڅارئ
د خبریالانو او رسنیو د نورو کارکوونکو د قربانیانو کورنۍ بیا د حکومت له لوري خبریالانو پر وړاندې د تاوتریخوالي پېښو پر نه څېړل کېدو نیوکه کوي او تور پورې کوي چې د عاملانو په نیولو کې یې پاتې راغلی دی.
- له طالبانو د نی غوښتنه؛ د خبریالانو له وژنو لاس واخلئ!
- د ملګرو ملتونو له امنیت شورا نه د افغان خبریالانو د خوندیتوب غوښتنه
- د خبریالانو پر وړاندې د تاوتریخوالي د ۲۱ پېښو په تړاو ۴۶ کسان نیول شوي
په ننګرهار کې د انعکاس ټلوېزیون د کارکوونکو شهناز پلار عبدالرووف او د مرسل پلار وحیدالله خوږیاڼی وايي، لورانې یې له منځه ولاړې، خو هېچا یې بیا پوښتنه ونه کړه.
د دوی په وینا، حکومت او نور بنسټونه دې د خبریالانو پر وړاندې د تاوتریخوالي پېښو غندلو پر ځای، د هغو عاملان ونیسي او د قانون منګولو ته دې وسپاري.
د خبریالانو ترورېدل، پر هغوی ډلهييز بریدونه، د سولې په روانه پروسه کې یې له پامه غورځول، د هغوی پر کورنیو بریدونه، د خبریالانو پر وړاندې د تاوتریخوالي پېښو د څېړلو په برخه کې د حکومت بېغوري او د دغو پېښو د جزیانو نه شریکول هغه څه دي چې خبریالانو او د هغوی ملاتړي بنسټونه یې په اړه اندېښنه لري.
