د ملګرو ملتونو د ماشومانو نړیوال صندوق یا یونیسف وايي، په افغانستان کې د طالبانو او افغان ځواکونو ترمنځ جګړې یوازې په درې ورځو کې ۲۷ ماشومان وژلي دي.
یونیسف پرون په یوه خبرپاڼه کې خبرداری ورکړ چې د ماشومانو پر وړاندې تاوتریخوالی ډېر شوی او هغوی ته د مرګژوبلې اوښتو کچه هم ورځ تر بلې ډېرېږي.
د سلاموطندار پښتو فېسبوکپاڼه وڅارئ
د دغې ادارې په وینا، په همدې موده کې په کندهار، پکتیا او خوست ولایتونو کې ۱۳۶ نور ماشومان ټپیان شوي دي.
د یونیسف د راپور پر بنسټ، نه یوازې د سړک غاړې ماین چاودنې د ماشومانو ژوند اخلي، بلکې د طالبانو او افغان ځواکونو ترمنځ مخامخ جګړو کې هم ورته مرګژوبله اوړي.
په افغانستان کې د یونیسف دفتر مسووله سامانتا مورت وايي: «افغانستان له ډېرې مودې راهيسې په نړۍ کې د ماشومانو لپاره یوه تر ټولو بده سیمه ده، خو دغه وضعیت په وروستیو اوونیو کې نور هم خراب شوی او ورځ تر بلې په خرابېدو دی.»
یونیسف د جګړې له ښکېلو لوریو غوښتي چې د نښتو پر مهال د ماشومان ژوند او خوندیتوب ته پام وکړي او په اړه یې ډاډ ترلاسه کړي.
