د رییسالوزرا دویم مرستیال عبدالسلام حنفي وايي، د لوړو زدهکړو وزارت باید د پوهنتونونو نصاب نننیو اړتیاوو ته په کتو جوړ او پلی کړي.
هغه چې نن د لوړو زدهکړو وزارت د نوي سرپرست ندامحمد ندیم د پېژندنې غونډه کې خبرې کولې وویل، دغه وزارت باید د پوهنتونونو پر درسي نصاب بیاکتنه وکړي او داسې نصاب جوړ کړي چې نننیو اړتیاوو ته ځواب ووايي.
په همدې حال کې د اسلامي امارت یو لوړپوړی غړی عبدالحمید حماسي په دې غونډه کې د عصري زدهکړو پر پیاوړتیا د ټینګار ترڅنګ وویل چې اسلامي امارت باید دې برخې ته ځانګړی پام وکړي.
هغه وايي، عصري زدهکړې د نننۍ نړۍ تر ټولو لومړنۍ اړتیا ده او په خبره یې، افغانان د کیمیا، فزیک او نورو علومو زدهکړې ته اړتیا لري.
د اسلامي امارت ویاند ذبېحالله مجاهد تېره اوونۍ پر ټویټر ولیکل چې مشر یې هبتالله اخوندزاده د کابل پخوانی والي ندامحمد ندیم د لوړو زدهکړو وزارت د سرپرست په توګه ټاکلی دی. ندیم نن په رسمي ډول خپل کار پیل کړ.
د سلاموطندار پښتو فېسبوکپاڼه وڅارئ
هېواد کې د اسلامي امارت له واکمنېدو راهیسې عبدالباقي حقاني د لوړو زدهکړو وزارت سرپرست و چې وختناوخت به یې په پوهنتونونو کې د محصلانو او د هغوی د زدهکړو په اړه پاروونکې خبرې کولې.
