پاکستاني پولیسو نن «د زمري څوارلسمه، د شنبې ورځ» په لاهور کې د پاکستان پخوانی لومړی وزیر او د تحریک انصاف ګوند مشر نیولی دی.
پولیسو له هغه وروسته عمران خان نیولی چې د اسلاماباد لومړنۍ محکمې هغه ته د مالي غبن او د بهرنیو هېوادونو له مشرانو څخه د ډالیو ترلاسه کولو په قضیه کې ګرم وباله او د درېوو کلونو بند سزا یې ورته واوروله.
د سلاموطندار پښتو فېسبوکپاڼه وڅارئ
د اسلاماباد عالي محکمې یوه قاضي همایون دلاور عمران خان ته د یادې سزا ورکولو پرېکړه اورولې، خو هغه د دغه قاضي په اړه اندېښنه ښودلې وه او د اسلاماباد عالي محکمې څخه یې غوښتي و چې د ده دوسیه د همایون دلاور له دېوان څخه یوه بل دېوان ته ولېږدي.
د راپورونو له مخې، د اسلاماباد عالي محکمې تېره ورځ د عمران خان دا غوښتنه رد کړې او په وینا یې، له یوه دېوان څخه بل ته د دوسیې لېږد پر محکمو د بېباوري لامل کېږي.
د پاکستان د احتساب ملي ادارې یا نېب د روان زېږدیز کال د مې میاشتې په نهمه د تحریک انصاف ګوند مشر عمران خان ونیوه چې ورسره د دغه هېواد په ټولو ښارونو کې پراخ او تاوتریخجن لاریونونه وشول او پر مهال یې یوشمېر پوځي او عامه بنسټونو ته زیانونه هم واوښتل.
پاکستاني پولیسو هغه مهال د محکمې د لارښوونې له مخې، عمران خان خوشې کړ، خو اوس یې داسې مهال نیولی چې د پاکستان د ملي پارلمان د کاري مودې پای ته اووه ورځې پاتې دي. د پاکستان لومړي وزیر شهباز شریف تازه د دغه هېواد د پارلمان منحلېدو اعلان هم کړی دی.
ټاکل شوې چې پاکستان کې د پارلمان د دورې له پای ته رسېدو سره سم نوې پارلماني ټاکنې وشي، خو لا روښانه نهده چې محکمه به د عمران خان په اړه څه پرېکړه کوي او ایا هغه به په دغو ټاکنو کې ګډون وکړای شي، که نه.
