کابل ته د پاکستان د ملي امنیت سلاکار له سفر وروسته د دغه هېواد حکومت ویلي، له اسلامي امارت سره د کرښې په عبوري سیمو کې د اسانتیاوو د زیاتولو لپاره په ملي کچه د همغږۍ میکانیزم جوړوي.
د پاکستان حکومت د اطلاعاتو وزارت په یوې خبرپاڼه کې ویلي چې د کرښې په عبوري سیمو کې د خلکو د تګ راتګ لپاره د اسانتیاوو ډېرولو په موخه له اسلامي امارت سره دې هوکړې ته رسېدلي چې د همغږۍ یو ګډ میکانیزم جوړ کړي.
د سلاموطندار پښتو فېسبوکپاڼه وڅارئ
په خبرپاڼه کې راغلي چې دغه هوکړه کابل ته د پاکستان د ملي امنیت سلاکار په مشري د تللي پلاوي په وروستي سفر کې شوې ده. د پاکستان د ملي امنیت سلاکار معید یوسف او ورسره مل پلاوی یې د روانې اوونۍ د شنبې پر ورځ په یوه دوه ورځني سفر کابل ته راغلي وو.
د رپوټونو پر بنسټ، معید یوسف کابل ته د سفر پرمهال د اسلامي امارت د رییسالوزرا له دویم مرستیال عبدالسلام حنفي او د بهرنیو چارو وزارت له چارسمبالي امیرخان متقي سره لیدنې درلودې.
په ورته مهال خبرپاڼه کې ویل شوي چې پاکستاني پلاوي کابل ته د خپل سفر په ترڅ کې له اسلامي امارت سره د پاکستان او افغانستان ترمنځ له پیسو پرته پر راکړې ورکړې یا بارټر هم هوکړه کړې.
خبرپاڼه کې همداراز افغانستان ته د پاکستان د بشري مرستو په اړه ډاډ ورکړل شوی او ویل شوي چې دغه هېواد به له افغانستان سره خپلې بشردوستانه مرستې جاري ساتي.
