د میدان وردګو ولایت د عامې روغتیا مسوولان وایي چې د تېرو کلونو په پرتله، د دغه ولایت په مرکز او ولسوالیو کې د زېږون پرمهال د مور او ماشوم د مړینې کچه راټېټه شوې ده.
د دغه ولایت د عامې روغتیا رییس زرک ځیرک د یوې غونډې پرمهال ویلي چې د تېر یوه کال له پیله تراوسه، په دغه ولایت کې، د ۲۰۰۰۰ په شاواخو کې ماشومان زېږیدلي چې یوازې ۵ مېرمنې د زېږون پرمهال مړې شوي دي.
د سلاموطندار پښتو فېسبوکپاڼه وڅارئ
خو نوموړي په دغه ولایت کې د مور او ماشوم د مړینې کچې د راټېټېدو لاملونو په اړه څه نه دي ویلي. هغه همداراز دا هم نه ده په ډاګه کړې چې د کومو لارو چارو به غوره کولو او روغتیايي خدماتو په وړاندې کولو سره، په دغه ولایت کې د زېږون پرمهال د مور او ماشوم د مړینې کچه راټيټه شوې ده.
هغه زیاته کړه چې اوس په میدان وردګ کې ۱۲۰ ښځینه روغتیاپالانې د دغه ولایت په مرکز او ولسوالیو کې خلکو ته روغتیايي خدمات وړاندې کوي.
د دښت توپ روغتیايي مرکز روغتیا پالې ظریفې په دې غونډې کې وویل چې د پخوا په پرتله یې خلکو ته د روغتیايي خدماتو رسول، ښه شوي دي.
نوموړې زیاته کړه چې د امنیت په ټينګښت سره، د دغه ولایت په ټولو سیمو کې یې خدمات په سمه توګه روان دي او ستونزې یې هوارې شوې دي.
که څه هم په میدان وردګ کې د زېږون پرمهال د مور او ماشوم د مړینې کچې د راټیټېدو خبره کېږي، خو لا هم د دغه ولایت په لریو پرتو سیمو کې مېرمنو ته کلیوالي ولادتونه ورکول کېږي.
