د بهرنیو چارو وزارت د یوې خبرپاڼې په خپرولو سره د افغان کډوالو په اړه د پاکستان د بهرنیو چارو وزیر شاه محمود قریشي وروستیو څرګندونو ته غبرګون ښودلی او له دغه هېواد څخه یې غوښتنه کړې چې له کډوالو څخه د افغانستان پر وړاندې د فشار په توګه ګټه نه اخلي. شاه محمود قریشي وړمه ورځ ویلي وو چې پاکستان په وروستیو څو کلونو کې د ۳.۵ میلیونه افغان کډوالو کوربه وو او له دې ډېر یې نه شي منلی.
قریشي ویلي چې پاکستان باید خپلې پولې وتړي او له خپلو ملي ګټو دفاع وکړي. د پاکستان د بهرنیو چارو وزیر اندېښنې ښودلې وه چې افغانستان کې د تاوتریخوالي ډېروالی به دغه هېواد ته د افغان کډوالو څپې ورماتې کړي.
د سلاموطندار پښتو فېسبوکپاڼه وڅارئ
دا په داسې حال کې ده چې له دې وړاندې د پاکستان لومړي وزیر عمران خان له نیویارک ټایمز سره په ځانګړې مرکه کې ویلي و. که طالبان پر افغانستان ولکه ټينګه کړي، پاکستان به خپلې پولې وتړي. نوموړي ټینګار کړی و چې له نظامي لارې پر افغانستان د طالبانو ولکه به پاکستان ته د افغان کډوالو د ورتللو سبب شي او ګنشمېر افغانان به دغه هېواد کې یوځل بیا کډوال شي.
په همدې حال کې د بهرنیو چارو وزارت ټینګار کړی چې هېواد ته له پاکستان څخه په عزت سره د افغان کډوالو د بېرته راستنېدو دوامداره غوښتنه کوي او په دې برخه کې له پاکستان سره د شویو دوه اړخیزې هوکړې له لارې له هغې ډلې د سولې او یووالي لپاره د افغانستان-پاکستان په عملي پلان له پاکستان سره ګډ کار کوي.
د افغانستان د بهرنیو چارو وزارت په یوې خبرپاڼه کې چې نن یې خپره کړې، همداراز ویل شوي چې ګاوندي هېوادونه باید د کډوالو له مساله څخه د افغانستان پر وړاندې د فشار په توګه کار وانخلي. د بهرنیو چارو وزارت ټينګار کړی چې په افغانستان کې د تلپاتې سولې او د وینې درېدو په برخه کې د پاکستان ونډه، د دغه هېواد د لوړپوړو چارواکو د اندېښمنوونکو وړاندوینو او نظرونو په پرتله خورا مهمه او غېزمنه ده.
- افغان حکومت پاکستان ته: د سولې ویجاړوونکي په افغانستان کې د وینې تویوونکي دي
- محب: له پاکستان سره مو اړیکې اوس هم ښې نه دي
- پاکستان کې مېشت افغان کډوال له ناوړه اقتصادي وضعیت او وزګارتیا سر ټکوي
په وروستیو ورځو کې د کابل او اسلاماباد ترمنځ د لفظي شخړو تازه لړۍ پیل شوې ده. وړمه ورځ د پاکستان د کورنیو چارو وزیر ویلي و چې له افغاني طالبانو یې غوښتنه کړې چې پاکستان ته د افغانستان له خاورې د تحریک طالبان او نورو ترهګرو ډلو د ګواښونو مخه دې ونیسي.
د پاکستان د کورنیو چارو وزیر دغو څرګندونو ته د افغانستان د بهرنیو چارو وزارت غبرګون ښودلی او ویلي یې دي چې تحریک طالبان په افغانستان کې رېښې نه لري او اسلاماباد باید له ترهګرو سره توپیري چلن ونه کړي.
