د افغانستان د شیعه علماوو شورا نن د هېواد د روان وضعیت په اړه په کابل کې خپله درېیمه غونډه جوړه کړه. د دې غونډې ګډونوالو له طالبانو مشخصې غوښتنې وکړې. دوی وغوښتل چې په هېواد کې د ټولو قومونو په ګډون ټولشموله حکومت جوړ کړي.
د پوهنتون استادې مرضیې کاظمي په دې غونډه کې وویل، ټول افغانان باید د چارو سر ته رسولو لپاره مساوي حقوق او امتیازونه ولري.
هغه وايي، شیعه مذهب باید په راتلونکي نظام کې په رسمیت وپېژندل شي.
د افغانستان د شیعه علماوو شورا غړی محمد اکبري هم وايي چې طالبان باید د یوموټي هېواد لپاره په سیاسي، اداري او ټولنیزه برخه کې نورو قومونو ته هم ونډه ورکړي.
د شیعه علماوو شورا تر دې مخکې هم له طالبانو غوښتي و چې خپلې ژمنې پوره او د هېواد د روان وضعیت ښه کېدو لپاره هڅې وکړي.
