د اسلامي امارت ویاند ذبېحالله مجاهد پر خپله ټوېټرپاڼه لیکلي چې د اسلامي امارت ځواکونو کابل کې د داعش ډلې پر یوه پټنځای عملیات کړي دي.
د نوموړي په وینا، دغه عملیات بېګاه ناوخته چهارشنبه د مرغومې څوارلسمه د کابل اتمې حوزې اړوند د قلعهچې او شهدای صالحین سیمو کې شوی دی.
د اسلامي امارت ویاند ویلي چې په دې عملیاتو کې اووه داعشیان وژل شوي او اووه نور ژوندي نیول شوي دي. ذبېحالله مجاهد همداراز زیاته کړې چې پرون یې نیمروز کې د داعش ډلې دوه غړي هم وژلي دي.
په ورته مهال ذبېحالله مجاهد نن پنجشنبه د مرغومې پنځلسمه په یوه بل ټوېټ کې ویلي چې د ننګرهار د درهنور ولسوالي په «شېمل» سیمه کې د اسلامي امارت د ځواکونو د عملیاتو پر مهال درې داعشیان وژل شوي دي.
مجاهد همداراز ویلي چې په وژل شویو کې د موسی په نوم د داعش ډلې یو مهم غړی هم وژل شوی دی.
د یادونې وړ ده چې کابل کې سرچینو پرون چهارشنبه ناوخته د پلازمېنې اتمې حوزې اړوند سیمه کې د څو پرلهپسې چاودنو خبر ورکړی و.
سلاموطندار پر ټویټر هم وڅارئ
په همدې حال کې ځینو سرچینو ویلي و چې اسلامي امارت د داعش پر پټنځای برید کړی دی. داعش ډلې تراوسه په دې اړه څه نه دي ویلي.
