د کډوالو نړیوالې ورځې سره هممهاله د بښنې نړیوال سازمان له پاکستان غوښتنه کړې چې دغه هېواد کې د افغان کډوالو له ځورونې او نیونې لاسه واخلي.
ملګري ملتونه د کډوالو وضعیت په اړه د عامه پوهاوي لوړولو په موخه هر کال د جون ۲۰مه د کډوالو نړیوالې ورځې په توګه نمانځي.
د سلاموطندار پښتو فېسبوکپاڼه وڅارئ
دغه ورځ داسې مهال رارسېږي چې په دې وروستیو کې پاکستان کې له افغان کډوالو سره د دغه هېواد د پولیسو ناسم چلن او ځورونې پېښې زیاتې شوې دي.
د یاد سازمان په راپور کې راغلي چې افغانستان کې د حکومت له پرځېدو وروسته ګڼشمېر افغانانو د وېرې له امله پاکستان ته تښتېدلې چې د دغه هېواد د پولیسو له ناسم چلن سره مخ دي.
راپورکاږي چې پاکستان کې د کډوالو عالي کمېشنري سره د افغانان کډوالو د ثبت بهیر او د ویزو نويکېدو پروسه ځنډنۍ ده چې دې چارې د پاکستان پولیسو ته له افغان کډوالو د پیسو اخیستل او ځورونې چانس په لاس ورکړی دی.
ایران او پاکستان کې د افغان کډوالو کړاونه؛ «کډوالو ته به درانه کارونه ورکوئ»
ایران کې یو ۱۵کلن افغان کډوال په مرموز ډول وژل شوی
د ترکیې ټاکنې؛ افغان کډوالو د خپل برخلیک ټاکلو لپاره رایه کارولې
د بښنې نړیوال سازمان په دغه راپور کې ټينګار کړی چې د کډوالو لپاره د ملګروملتونو عالي کمېشنري دې د افغان کډوال د ثبت او د اسنادو د بیاکتنې لړۍ چټکه کړي او پر پاکستان یې غږ کړی چې د ا فغانانو د نیونې او ځورونې د درېدو ترڅنګ دې دوی ته د ویزو پروسه اسانه کړي.
بلخوا د کډوالو لپاره د ملګروملتونو عالي کمېشنري د کډوالو نړیوالې ورځې په تړاو یوې خبرپاڼه کې ویلي چې د ۲۰۲۲ کال تر پایه په ټوله نړۍ کې ۳۵،۵ میلیونه وګړي کډوال شوي چې د تېر ۲۰۲۱ کال په پرتله اته میلیونه زیاتوالی ښيي.
د یادو کډوالو نږدې ۵۲سلنه یې د سوریې، اوکراین او افغانستان اړوند اوسېدونکي دي چې د بېلابېلو لاملونو له کبله کډوالۍ ته اړ شوي دي.
The Government of Pakistan must urgently stop arbitrarily arresting and harassing Afghan refugees and asylum seekers, many of whom are fleeing persecution by the Taliban.
https://t.co/orOTWUHZiI— Amnesty International (@amnesty) June 20, 2023
د کډوالو نړیوالې ورځې رارسېدو سره هممهاله د کډوالو لپاره د ملګروملتونو عالي کمېشنري د معلوماتو له مخې، دا مهال څه باندې درې میلیونه افغانان پاکستان کې کډوال دي. ایران کې هم میلیونونه افغانان د کډوالۍ شپې او ورځې تېروي.
د کډوالو عالي کمېشنري د معلوماتو له مخې، نړۍ کې دا مهال د څه باندې ۳۵ میلیونه کډوالو سربېره څه باندې ۷۵ میلیونه په خپلو هېوادونو کې بېځایه شوي دي.
